Ish-kreu i PS-së në Sarandë, tashmë kandidat i pavarur në 14 maj, Gjergj Mërkuri ia ka bërë të qartë kryeministrit Edi Rama se nuk do të tërhiqet nga gara. Kësaj ftesë, Mërkuri iu përgjigj ironikisht me vetë sloganin e socialistëve, “Nuk ka kthim mbrapa, vetëm përpara”.
“Të dashur miq, slogani ynë i kësaj fushate elektorale për Bashkinë e Sarandës “Vendosin qytetarët, jo partitë”, bëri të kuptojnë qartë të gjithë aktorët politikë fitoren tonë në 14 maj. Ne jemi të bashkuar dhe me një ambicie të vetme, që në 14 maj të triumfojë qytetaria. Ne jemi futur në këtë garë që të fitojmë dhe ta çojmë Sarandën në një fazë tjetër zhvillimi, duke u bazuar në dashurinë që kemi për këtë qytet ku ushtrojmë aktivitetet tona jetësore të përditshme.
Ditën e djeshme Saranda u vizitua nga kryeministri i Shqipërisë, Z. Edi Rama, duke dëgjuar fjalët e mira në adresën time dhe kërkesën e tij, ne si qytetarë i përgjigjemi me sloganin e tij të fushatës elektorale:“Nuk ka kthim mbrapa, vetëm përpara”, tha ai.
Kur kanë mbetur 1 javë nga fushata elektorale, Mërkuri tha se kjo nuk është një betejë politike, por për qytetin. Ndaj, ftoi të gjithë qytetarët, të majtë dhe të djathtë që ta votojnë në 14 maj.
“Teksa na ndajnë dhe një javë nga data zgjedhjeve unë informoj të gjithë bashkëqytetarët e mi se fushata jonë vazhdon intensivisht dhe këtë javë. Ne do të jemi kudo, do të flasim me çdo qytetar që e do Sarandën, të majtë dhe të djathtë qofshin. Kjo nuk është një betejë poltike, kjo është një betejë për Sarandën dhe qytetarët do të triumfojnë në 14 maj. Ndaj këtë javë ftoj çdo mbështetës dhe simpatizantë, të flasë me këdo që mundet, të përcjellë mesazhin në çdo cep të qytetit, të unifikojmë forcat, pasi nga fitorja na ndan vetëm një javë”- shkruan Mërkuri në reagimin e tij.
Ky reagim vjen pas deklaratës së Ramës në Sarandë, ku pranoi se Mërkurit “i kanë rënë në qafë”, e ndërsa foli me superlativa për të.
“Gjergj Mërkuri është një djalë idealist, një djalë i ndershëm, i drejtë. Gjegj Mërkurit njerëz këtu të PS i kanë rënë në qafë dhe kanë bërë gabimin shumë të madh. Kjo nuk është arsye për të bërë atë Stefani nuk e bën kurrë. Kjo nuk është arsye për tu çuar dhe për të dalë matanë rrugës dhe për të kërkuar vota që i bëjnë dëm PS në këtë betejë. Nuk ka asnjë këtu që është në këtë shesh, nuk ka asnjë këtu që nuk është në këtë shesh dhe që nuk e do kthimin mbrapa, që është dakord me atë që po bën Gjergji aktualisht. Hatërmbetja nuk është këshilltar i mirë”, tha Rama në një takim që pati pak ditë më parë në Sarandë.
Në këtë Bashki garojnë Skënder Muço nga Partia Demokratike, Ardit Çikuli nga Koalicioni “Bashkë Fitojmë”, Oltion Çaçi nga PS dhe Gjergj Mërkuri, kandidat i pavarur.
