Arben Meksi vlerësohet me çmim ekselence në konkursin botëror të karikaturës për ‘Lirinë e shtypit’ të mbajtur në Kanada me pjesëmarrjen e 62 shteteve. Artisti nga Vlora, rrëfen zhanrin artistik në zbehje dhe ëndrrën e tij për të pasur në Lungomare hapësirë për vepra publike, edhe me karikaturë në skulpturë
Karikaturisti i njohur shqiptar Arben Meksi, ka triumfuar në një konkurs ndërkombëtar që është mbajtur në Kanada, ku janë prezantuar 470 punime të 62 artistëve nga vende të ndryshme të botës.
Tema ishte “Liria e shtypit në botë” dhe punimi i Arben Meksit, të cilin e shikoni dhe në foto, ka fituar çmimin e “Ekselencës”. Konkursi ndërkombëtar për karikaturat zhvillohet çdo vit në Kanada, prej vitit 2000, dhe është nga më të rëndësishmit në botë.
Ky çmim i marrë nga Meksi, është i dyti për Karikaturën shqiptare në një vend si Kanadaja, pas atij që ka marrë karikaturisti dhe piktori i njohur Ilir Pojani, vite më parë.
Punimi fitues i Arben Meksit u vlerësua jo vetëm për mesazhin dhe metaforën e goditur që përcillte, por edhe për realizimin artistik të saj. Çmimet janë shpallur nga një juri profesioniste më datë 3 Maj 2023.
“Ishte një çmim i rëndësishëm për karikaturën shqiptare, njëkohësisht edhe për mua si autor. Ishte i rëndësishëm për faktin se zhvillohet në një vend si Kanadaja, ku kërkesa për artin dhe cilësinë e tij është shumë e lartë, dhe sepse trajtonte një temë universale për të cilën është e shqetësuar gjithë bota”, shprehet arkitekti dhe karikaturisti Arben Meksi.
Vlerësimi i Meksit në këtë garë botërore, rikonfirmon edhe një herë artistët vendas si kompetitiv në rang botëror, edhe pse zhanri i karikaturës në Shqipëri vjen në zbehje. E megjithatë për rivitalizimin e këtij arti, jo thjesht në telajo por edhe në hapësira publike përmes skulpturës, artisti nga Vlora e ka një ëndërr që lidhet me qytetin e tij.
