Senatorja amerikane Jeanne Shaheen ka propozuar një projekt ligj që promovon dhe nxit bashkëpunimin dhe përmirëson politikën e SHBA me Ballkanin Perëndimor. Senatorja risolli në senat projektligjin “Akti i Demokracisë dhe Prosperitetit të Ballkanit Perëndimor” që synon të mbështesë stabilitetin demokratik dhe zhvillimin ekonomik në rajon përmes iniciativave për infrastrukturën, tregtinë dhe anti-korrupsionin.
“Ruajtja e paqes dhe forcimi i demokracisë në Ballkan është kritike për sigurinë dhe stabilitetin evropian, veçanërisht ndërsa lufta e paprovokuar e Putinit në Ukrainë po vazhdon. Projektligji do të forcojë tregtinë dhe investimet midis SHBA-së dhe Ballkanit Perëndimor, do të çrrënjosë korrupsionin dhe do të dërgojë një sinjal të fortë se Shtetet e Bashkuara janë të përkushtuara ndaj partnerëve tanë në rajon”, tha senatori Shaheen.
Ky projektligj i Jeanne Shaheen, kryetare e Nënkomisionit për Evropën në Komisionin për Marrëdhëniet me Politikën e Jashtme të Senatit Amerikan, është mbështetur edhe nga senatori Ben Cardin, i cili tha se do të rrisë bashkëpunimin SHBA-Ballkan për sigurinë kibernetike pas përpjekjeve keqdashëse të Iranit dhe Rusisë për të synuar vendet në rajon.
“Ky projektligj i rëndësishëm dhe bën thirrje për një qasje strategjike ndaj politikës së SHBA-së ndaj rajonit ende të paqëndrueshëm të Ballkanit Perëndimor, do të na çojë në drejtimin e duhur. Projektligji ynë do të çojë përpara stabilitetin rajonal dhe përpjekjet kundër korrupsionit duke krijuar programe që inkurajojnë zhvillimin ekonomik gjithëpërfshirës, strategjinë kombëtare kundër korrupsionit dhe do të mbajnë përgjegjës ata që kërcënojnë paqen në Ballkanin Perëndimor. Ne duhet të vazhdojmë të mbështesim partnerët dhe aleatët tanë demokratikë”, tha senatori Cardin.
