Ish-Ministri i Mjedisit Lefter Koka, ish-deputeti socialist Alqi Bllako dhe Arben Dervishi, të tre të arrestuar në lidhje me inceneratorin e Fierit, dolën sot para Gjykatës së Posaçme, ku do të vendosje në lidhje me kërkesën e tyre për gjykim të shkurtuar.
Megjithatë, seanca zgjati vetëm disa minuta, pasi trupa gjykuese, pasi u njoh me kërkesat e disa prej avokatëve të të pandehurve, e shtyu seancën për datën 29 maj në orën 10:00, me arsyetimin se kërkesat janë voluminoze dhe kërkojnë kohë për t’u shqyrtuar.
Lefter Koka akuzohet për shpërdorim detyre, pastrim të parave dhe korrupsion. Ndërsa Bllako akuzohet për shpërdorim detyre dhe korrupsion, pasi sipas SPAK ai ka falsifikuar dokumente shpronësimi për një tokë që nga arë ishte kthyer në truall dhe dokumentet e falsifikuara i janë paraqitur Këshillit të Ministrave, tokë mbi të cilën do ndërtohej inceneratori i Fierit.
Ndërkohë, në lidhje me inceneratorin e Elbasanit, Prokuroria e Posaçme kërkoi më 18 maj dënimin me 6.8 vite burg për ish- ministrin Koka dhe 2 administratorë ende në kërkim të incineratorit të Elbasanit, si dhe 2.8 vite burg për ish deputetin Alqi Bllakon i cili në kohën kur u dha leja e incineratorit ka mbajtur postin e ish sekretarit të ministrisë së Mjedisit.
Nga 2.8 vite burg u kërkua dënim edhe për 4 ish zyrtarë të kësaj ministrie. Për administratoren tjetër Stela Gugallja është kërkuar 4.8 vjet burg.
