“Trafikantët duhet ta dinë që ne nuk do të tolerojmë veprimet e tyre të neveritshme dhe kriminale. Së bashku, ne duhet të jemi të vendosur. Dhe së bashku duhet të vazhdojmë të ndërtojmë zinxhirin që lidh trafikantët me ndjekjet penale dhe dënimet, që mbështet viktimat me strehëza dhe përkrahje dhe ngre lart të gjithë Shqipërinë me premtimin e të nesërmeve më të ndritshme”, tha sot i Ngarkuari me Punë në Ambasadën e SHBA-së, Daniel Koski në Konferencën Rajonale kundër Trafikimit të Qenieve Njerëzore, mbajtur në Tiranë.
Në fjalën e tij, Koski tha se “nuk ka nevojë të thuhet që trafikantët janë të zgjuar. Ata përshtaten. Përpiqen të qëndrojnë një hap përpara drejtësisë. Por, edhe pse ne nuk mund t’i shohim gjithmonë, në të vërtetë dimë shumë rreth tyre. Ne dimë se si punojnë. Dimë se ku punojnë. Dhe, në shumë raste, dimë se cilët janë”.
Ai deklaroi se SHBA do të mbështesë të gjithë prokurorët e ndershëm në këtë rrugë të dënimit të trafikantëve.
“Prokurorët e rretheve formojnë një hallkë. Ligji në dispozicion të tyre për të ndjekur penalisht trafikantët është një tjetër. Duke përdorur ligjin ekzistues prokurorët mund t’i nxjerrin jashtë shoqërisë shqiptare trafikantët dhe t’i futin në burg, aty ku e kanë vendin. Prokurorë, ju bëj thirrje që të hetoni, të ndiqni penalisht dhe të dënoni më shumë trafikantë. Ne do t’ju mbështesim gjatë rrugës”, u shpreh më tej ai.
Koski tha se “Koordinatorëve të viktimave, punonjësve socialë dhe punonjësve të strehëzave që i bëjnë viktimat sërish të plota – secili prej jush është një hallkë tjetër në zinxhir. Trafikantët shkaktojnë dëme për viktimat e tyre dhe për shoqërinë shqiptare, por ju shërbeni për t’i shëruar ato plagë. Ju ofroj lëvdatat e për financimin dhe punësimin e koordinatorëve të viktimave në zyrat e prokurorisë. Këto janë para dhe përpjekje të shpenzuara mirë. Për të ndihmuar në krijimin e hallkës tjetër në zinxhirin tonë, I bëj thirrje qeverisë të ndihmojë që strehëzat e trafikimit të lulëzojnë”.
I ngarkuari me Punë në Ambasadën e SHBA-së tha se “vitin e kaluar, qeveria bëri gjënë e duhur dhe financoi strehëzat për viktimat e trafikimit. Këtë vit, i bëj thirrje qeverisë shqiptare të ndërmarrë hapin tjetër logjik duke krijuar një mekanizëm financimi që ndan fonde dhe burime të përshtatshme për strehëzat mbi një bazë të qëndrueshme dhe të rregullt. Nevoja për strehëza të financuara mirë nuk mbaron me përfundimin e vitit kalendarik”.
“Fonderia në të cilën farkëtojmë hallkat e zinxhirit është reforma në drejtësi e Shqipërisë. Edhe pse vetingu i gjyqtarëve dhe prokurorëve qëndron në zemër të saj, reforma në drejtësi është më shumë se kaq. Ajo parashikon një shoqëri që mbron anëtarët e saj më të cenueshëm dhe ndëshkon ata që i viktimizojnë. Shfrytëzojeni vrullin e reformës në drejtësi, për të nxitur dhe frymëzuar veprimet tuaja për të luftuar trafikimin e qenieve njerëzore. Kjo është një forcë e pandalshme. Përdoreni energjinë e saj”, apeloi ai.
Koski tha se “drejtuesit në nivelet më të larta të qeverisë së Shteteve të Bashkuara kanë treguar një angazhim për reformën në drejtësi dhe për të luftuar trafikimin, duke marrë forcë nga tradita amerikane e çlirimit të njerëzimit, e njëjta traditë e nderuar nga Frederick Douglass. Siç ka thënë kohët e fundit Sekretari i Shtetit Pompeo, “trafikantët duhet ta dinë që ne nuk do të tolerojmë veprimet e tyre të neveritshme dhe kriminale”. Së bashku, ne duhet të jemi të vendosur. Dhe së bashku duhet të vazhdojmë të ndërtojmë zinxhirin që lidh trafikantët me ndjekjet penale dhe dënimet, që mbështet viktimat me strehëza dhe përkrahje dhe ngre lart të gjithë Shqipërinë me premtimin e të nesërmeve më të ndritshme. Ju përgëzoj të gjithëve për përpjekjet tuaja të shkëlqyera dhe shpreh zotimin e palëkundur të Shteteve të Bashkuara për qëllimet tona të përbashkëta”./ATSH/
