Qeveria e Kosovës ka reaguar zyrtarisht për draftin për krijimin e Asociacionit të Komunave Serbe, që kryeministri i Shqipërisë Edi Rama tha se ia ka dërguar Gjermanisë dhe Francës.
“Nga Shqipëria zyrtare presim mbështetje. Ndërmjetësues kemi shumë”, tha zëdhënësi i qeverisë, Përparim Kryeziu për KosovaPress.
Kryeziu shtoi se qëllimi serb për Asociacionin është krijimi i një Republika Srpska në Kosovë, njëlloj si në Bosnje-Hercegovinë. “Çështja e kryetarëve të katër komunave në veri të vendit është çështje e respektimit të kushtetutës, sundimit të ligjit dhe ofrimit të shërbimeve ndaj qytetarëve tanë, që për shkak të bojkotit të diktuar nga Serbia u kishin munguar për plot 6 muaj. Çështja e marrëveshjeve të mëhershme për Asociacionin e komunave me shumicë serbe është çështje e funksionalitetit të shtetit të Kosovës dhe kjo u dëshmua me draftin e prezantuar nga Ekipi Menaxhues që drejtohej nga deputetja e Vuçiçit që synonte një Republika Srpska në Kosovë dhe së fundmi me nonpaperin e Akademisë së Shkencave dhe e Artit e Serbisë që flet për ‘Botën serbe’. Në të dy rastet në pyetje është Kosova. Në të dy rastet rreziku është Serbia. Ata që janë të lirë në qëndrime dhe pa ndonjë ngarkesë, e kuptojnë këtë”, tha ai.
Një ditë më parë, në një përgjigje zyrtare për A2 CNN, zëdhënësi i Bashkimit Europian, Peter Stano, mirëpriti propozimin e Ramës, por tha se statuti për formimin e Asociacionit do të bëhej vetëm përmes procesit të dialogut Prishtinë-Beograd.
Të enjten, Kurti u shpreh se marrëveshja do të arrihet nëse ka pajtueshmëri në parim për shtyllat e saj. “Nuk mund të shkruajmë tekste alternative ndërmjet të cilëve mund të gjendet një mesatare aritmetikore pa u pajtuar njëherë në parim”, u shpreh Kurti në Kuvend.
Kryeministri Rama tha të enjten se draftin e tij për Asociacionin – një dokument konfidencial për momentin – të realizuar me ekspertë të huaj, përfshi edhe amerikanë, ia kishte dërguar liderëve të Gjermanisë dhe Francës, por nuk e kishte konsultuar me Kurtin për dokumentin.
Deklarata e Ramës ngjalli reagime në Shqipëri dhe Kosovë. Ish-kryeministri Sali Berisha tha se teksti ishte shkruar në Beograd, ndërsa ish-ministri i Jashtëm i Kosovës, Enver Hoxhaj, mbështeti qëndrimin e Ramës për këtë çështje.
