Gjykata Kushtetuese rrëzon ankimimin e 28 deputetëve të opozitës, për shpalljen si antikushtetues të vendimit të qeverisë, për konfiskimin për interes publik të objekteve të ndërtuara pa leje për qëllim fitimi.
Nëpërmjet një njoftimi për shtyp Gjykata Kushtetuese bëri të ditur se pasi mori në shqyrtim në seancë plenare publike çështjen me kërkues jo më pak se një të pestën e deputetëve (28 deputetë) të Kuvendit, me objekt: “Shfuqizimi i Vendimit të Këshillit të Ministrave “Për rregullat dhe procedurat për konfiskimin për interes publik të objekteve të ndërtuara pa leje për qëllim fitimi”, si i papajtueshëm me Kushtetutën e Republikës së Shqipërisë”, vendosi “rrëzimin e kërkesës”.
Sipas Gjykata Kushtetuese, ky vendim është përfundimtar dhe hyn në fuqi ditën e botimit në Fletoren Zyrtare.
“Vendimi përfundimtar do të shpallet i arsyetuar brenda afateve ligjore të parashikuara nga ligji “Për organizimin dhe funksionimin e Gjykatës Kushtetuese të Republikës së Shqipërisë”, dhe nga Rregullorja për procedurat gjyqësore të Gjykatës Kushtetuese.”- thuhet në vendimin e Gjykatës Kushtetuese.
Ligji i qeverisë
Pak muaj më parë, qeveria vendosi të sekuestrojë të gjitha hapësirat e ndërtuara pa leje në Tiranë dhe në rrethe të objekteve të ndërtuara pa leje për qëllim fitimi. Ndërtuesit i lihej të zgjidhte nëse do ta dhuronte këtë pjesë, ta blinte me çmimin e tregut ose në të kundërt, ajo do të merrej nga shteti.
Përfaqësuesit e qeverisë kanë deklaruar se në të gjitha rastet, ndërtuesi do të gjobitet dhe ndaj tij do të kishte ndjekje penale. Për situatën e krijuar nga ndërtimet, kryeministri Rama fajësoi edhe një pjesë të sistemit të drejtësisë.
Ankimi i vendimit nga opozita në Kushtetuese
Opozita e vlerësoi si antikushtetues vendimin e qeverisë për konfiskimin e ndërtimeve pa leje. PD e ankimoi vendimin e qeverisë në Gjykatën Kushtetues duke kërkuar shfuqizimin e tij. Sipas PD-së, nëpërmjet këtij vendimi, kryeministri, Edi Rama “mori në mbrojtje oligarkët e ndërtimit të Kullave pa leje në mes të Tiranës”.
“Vendimi është në kundërshtim me Kushtetutën, sepse cënon barazinë e shtetasve përpara ligjit, cënon hierarkinë e akteve normative dhe nuk është autorizuar nga ligji; – Është në kundërshtim me Kodin Penal, sepse i jep amnisti penale një kategorie personash, pa ligj të miratuar me 3/5 e votave në Kuvend; – Është në kundërshtim me ligjin për planifikimin dhe zhvillimin e territorit; “Vendimi i qeverisë parashikon që kushdo që ndërton kulla pa leje apo kate shtesë pa leje, duhet ta deklarojë, t’ia shesë shtetit për 1 euro, me pas mund ta blejë dhe e gëzon ndërtimin e paligjshëm i pashqetësuar. Ky akt është legalizim pa ligj i ndërtimeve pa leje, është amnisti penale pa ligj, duke i përjashtuar nga dënimi me burg, është certifikim i pabarazisë mes qytetarëve”, – thuhet në padinë e PD-së.
