Presidenti i Serbisë, Aleksandër Vuçiç ka deklaruar pas takimit në Bruksel me përfaqësuesit e Bashkimit Evropian se nuk ka një udhërrëfyes të caktuar për të dalë nga kriza në veri të Kosovës.
“Kemi diskutuar çështjen, substancën, e cila ishte e pashmangshme, por besoj edhe e dobishme, por atë që do të shohim nesër në terren, nuk e di…kur kemi kamionë në pritje...”, tha Vuçiç pas takimit bilateral me ndërmjetësuesit e dialogut Kosovë-Serbi, Borrell dhe Lajçak.
Sa i përket zgjidhjes së situatës në Kosovë, Vuçiç ka deklaruar se ka frikë se “çdo gjë ka shkuar shumë larg”.
Ndërmjetësuesit e dialogut Kosovë- Serbi, Joseph Borrell dhe Miroslav Lajçak zhvilluan sot takime të ndara bilaterale, fillimisht me kryeministrin e Kosovës, Albin Kurti dhe më vonë me presidentin e Serbisë, Aleksandar Vuçiç.
Ndërkaq pritet që Borell dhe Lajçak të takohen sërish me kryeministrin e Kosovës, Kurtin.
Më herët, Borell shkroi në Tëitter se “situata në veri të Kosovës vazhdon të jetë shumë e tensionuar. Sot, ne synojmë të gjejmë zgjidhje për ç’tensionimin e menjëhershëm dhe të ecim përpara”, shkruan Borrell në Twitter.
Diskutimet do të përqendrohen në gjetjen e një zgjidhje për situatën e krijuar në veri të Kosovës që ka tensionuar edhe më tej marrëdhëniet mes Kosovës dhe Serbisë.
Kurti ka theksuar më herët se në këtë takim do të insistojë në lirimin e 3 policëve të Kosovës që ndodhen ende në paraburgim në Serbi.
Ndërkohë ndërkombëtarët kanë bërë thirrje që të merren masa për qetësimin e situatës, duke paralajmëruar për pasojëa ndaj Kosovës dhe Serbisë.
Situata në veri të Kosovës u tensionua kur në krye të komunave u vendosën kryetarët e rinj, gjë e cila u shoqërua me protesta të dhunshme nga ana e protestuesve serbë, të cilët sulmuan ushtarët e KFOR-it, policinë e Kosovës dhe nuk kursyen as mediat e gazetarët e Shqipërisë dhe të Kosovës.
