Partia Demokratike ka nisur me procesin për zgjedhje e kryetarit të ri, por për analistin Preç Zogaj urgjente është organizimi i partisë. I ftuar në një emision tv Zogaj, teksa tha se procesi që po zhvillohet ka jo pak defekte, u shpreh se PD nuk mund të qëndrojë më një parti e paorganizuar, pa forume dhe me institucione që kanë humbur kuorumin që i ka zgjedhur.
“Shoh një proces me defekte. Në morinë e problemeve që janë tani në tryezën e PD, sekreti është të evidentohet problemi kryesor sepse do humbë arsyetimi dhe argumenti kryesor është kjo parti duhet të riorganizohet. Nuk mund të qëndrojë më një parti e paorganizuar, pa forume, me institucione që kanë humbur kuorumin që i ka zgjedhur dhe janë jolegjitime. Emergjencë në këtë parti ka riorganizimi. Më pas vazhdohet më tej”, u shpreh ai.
Zogaj u ndal edhe tek vendimi i kreut të grupit parlamentar të PD-së, Gazment Bardhi dhe e disa deputetëve të tjerë për të bojkotuar mbledhjen e Këshillit Kombëtar, teksa tha se largimi nuk është rruga e duhur.
“Unë nuk jam dakord me disa zëra që pala tjetër do ta çojë partinë te Sali Berisha. Këto janë mënyra të vjetra se sa herë i kam dëgjuar që prej 30 vitesh. Sa herë që dikush ka mendim ndryshe thonë që po bën punën e kundërshtarit. Njerëzit kanë mendime, kanë ambicie, konceptojnë zgjidhje që u vjen për shtat ambicies së tyre dhe është normale. Nuk ka as prapaskenë djallëzore, ka një opsion. Por nuk mund të ecet me që unë kam këtë mendim dhe nëse nuk doni ta pranoni, ta diskutoni, unë po iki. Kjo nuk është mënyrë për të funksionuar”, u shpreh Zogaj.
Zgjedhjet për kreun e PD-së do të mbahen më 29 korrik, ndërsa në garë janë Lulzim Basha dhe Gjergj Hani. Ky proces duket se e ka përçarë edhe më shumë PD-në, pasi disa deputetë, përfshirë edhe kreun e grupit parlamentar demokrat, Gazment Bardhi, kanë shprehur kundërshti.
