Pas përfundimit të provimeve të maturës shtetërore, të rinjtë që kanë vendosur të vijojnë studimet e larta duhet të aplikojnë në faqen zyrtare të portalit U-Albania. Kriteri bazë, ashtu siç do vit mbetet mesatarja e lëndëve të tre viteve dhe ajo e 4 provimeve të fundit, e cila duhet të jetë minimalisht 6,5 për të patur të drejtën e aplikimit.
Sipas Udhëzimit të fundit të publikuar nga Ministria e Arsimit, një tjetër risi që do të aplikohet këtë vit të ri akademik është edhe fakti se procedurat për aplikimin dhe regjistrimin e kandidatëve do të jetë e njëjtë edhe për ata me diplomë të huaj të shkollës së mesme, ndërsa do të reduktohet dokumentacioni që duhet dorëzuar për regjistrim, duke lehtësuar procedurat për të gjithë kandidatët.
Si do të kryhet regjistrimi i studentëve pas raundit të dytë
Pas raundit të dytë, në programet e studimit ku kanë mbetur kuota të lira pranimi, kandidatët që kanë aplikuar në U-Albania mund të vijojnë të regjistrohen drejtpërdrejtë në IAL deri në plotësimin e gjitha kuotave.
Hapi final është plotësimi i formularit A2 që ka të bëjë me renditjen e preferencave që do kryhet nga vetë kandidatët për student. Ai mund të kryhet në çdo mjedis ku ka akses interneti si në shtëpi, nëpërmjet telefonit, por edhe pranë çdo shkollë të mesme në ato raste kur do të kenë nevojë për t’u konsultuar me mësuesit.
