Kryeministri i Kosovës, Albin Kurti ka deklaruar se i ka kërkuar homologut të tij nga Shqipëria, Edi Ramës mbajtjen e mbledhjes së përbashkët të dy qeverive e anuluar pak javë më parë.
Kurti i ka vënë kusht Kryeministrit Edi Rama se nëse nuk mbahet mbledhja e përbashkët mes dy qeverive, nuk do të ketë takime mes tyre.
“Nëse kryeministri Rama insiston në anulimin e mbledhjes unë ngelem te qëndrimi që ja kam thënë se për takime mes nesh të dyve, ne kemi kontakte të drejtpërdrejta. Takohemi shumë shpesh.
Nuk lëngon raporti Kosovë-Shqipëri dhe as demokracia e paqja në Ballkan pse nuk takohen kryeministrat, por për shkak se anulimi i mbledhjes së përbashkët mes dy qeverive u anuluan pa arsyeshëm.
Prandaj e konsideroj të arsyeshme një mbledhje të përbashkët mes dy qeverive, por jo takime të tjera”, tha Kurti.
Në turin ballkanik që do të kryejë në kuadër të Samitit të radhës të Procesit të Berlinit, kryeministri Rama do të qëndronte një natë në Prishtinë, por homologu i tij nga Kosova, Kurti i vendosi kusht se nëse nuk mbahet mbledhja mes dy qeverive dhe nuk nënshkruhen 13 marrëveshjet e parashikuara për t’u firmosur në mbledhjen e anuluar, atëherë takimi mes tyre nuk do të ndodhë.
“Jam në kontakt të drejtëpërdjetë me Edi Ramën. E di që do vijë në një vizitë në Prishtinë në kuadër të turit ballkanik për përgatitjen e samitit të radhës të Procesit të Berlinit në mes të muajit tetor.
Unë miqësisht i kërkova që meqënëse do rrijë 2 ditë e një natë, të mbajmë dhe mbledhjen e 2 qeverive e cila u anulua paarsyeshëm.
Të gjitha përgatitjet i kishim bërë, 13 marrëveshjet kanë ngelur në sirtar. Çdo ditë e humbur është dëm për qytetarët, i propozova Ramës se meqë po vjen të mbajmë një mbledhje të përbashkët të dy qeverive”, tha Kurti.
