Rrahman Rraja ka dorëzuar mandatin e deputetit pas publikimit të një videoje në të cilën shfaqet i biri dhe persona të tjerë teksa dhunojnë brutalisht dy kushërinjtë Bilbil dhe Jashar Maja.
Në deklaratë për mediat, ish-deputeti, teksa u kërkon ndjesë kolegëve të Grupit Parlamentar të Partisë Socialiste, bën të ditur se do të tërhiqet nga jeta politike.
Një ndjesë Rraja ka edhe për qytetarët që e kanë votuar ndër vite si dhe për viktimat e dhunës së 6 korrikut në zonën e Thumanës.
Rrahman Rraja i bën thirrje të birit që të dorëzohet duke shtuar se tashmë ka një “turp mbi shpatulla si gur.”
Nuk kam fjale per ta shprehur sikletin karshi te gjithe atyre qe me kane besuar gjithe keto vite. Fatkeqesisht une deshtova si prind dhe ndjehem i turperuar publikisht nga femija im. Ju kerkoj ndjese shokeve dhe kolegeve te grupit parlamentar dhe deklaroj dorezimin e mandatit te deputetit dhe terheqjen time nga jeta politike. Ju kerkoj ndjese atyre qe me kane dhene voten prej vitit 2000 si kryetar komune dhe prej 2 mandatesh si deputet. Ju kerkoj ndjese viktimave te asaj dhune turperuese per familjen time. I bej thirrje djalit tim te dorezohet para drejtesise. Zoti me dhente force qe ta perballoj kete dhimbje te madhe dhe jete qe ta shlyej kete turp qe me la mbi shpatulla si gur im bir. Ne fund mirenjohje dhe ndjese edhe kryetarit te partise dhe kryeministrit, i cili nuk me kishte asnje borxh per kete shqetesim kaq te madh publik qe i shkaktova.
Deklaratë për media e deputetit të Partisë Socialiste, Rrahman Rraja
Policia deri më tani ka shoqëruar tetë persona dhe ka shpallur në kërkim gjashtë të tjerë për rrahjen brutale që iu bë dy kushërinjve Bilbil dhe Jashar Maja.
Ndërsa në pranga ranë Ineidi Rraja, Eni Kullaj, Kujtim Përdaku dhe Andi Rraja.
Mes dhunuesve janë dhe dy vëllezërit e deputetit socialist Rexhep Rraja, konkretisht Flamur dhe Xhelal Rraja, si dhe djali i Rrahman Rrajës.
Sipas policisë shkak i ngjarjes së rëndë është bërë një gurore në fshatin Borizanë në pronësi të Përparim Rrajës, i afërm i deputetit socialist i cili ka leje shfrytëzimi dhe licencë për aktivitetin.
Kushërinjtë Bilbil e Jashar Maja kishin bërë denoncim në polici se shpërthimet gjatë punimeve në gurore kishin krijuar dëme materiale në banesat e tyre por edhe shqetësime.
