U desh dalja e videos në rrjetet sociale që policia të reagojë. Sipas njoftimit të datës 6 korrik, policia e Tiranës deklaronte se ka ndodhur një konflikt mes 5 personave.
Informonte se janë shoqëruar në komisariat dy persona, ndërsa raportonte vetëm me inicialet e tyre, por në fakt në këtë konflikt siç rezultoi më pas nuk ishin 5 persona.
Policia u përpoq të saktësonte se gurorja është në pronësi të shtetasit me iniciale P.Rr, i cili ka leje shfrytëzimi dhe licencë për zhvillimin e aktivitetit.
Një ditë më pas, më 7 korrik, u publikuan pamjet që siç u kuptua nuk bëhej fjalë për një konflikt por për dhunë barbare, duke sjellë reagimin e ashpër të opinionit publik. Policia reagoi sërish, duke arrestuar 4 prej agresorëve dhe shpalli në kërkim 3 të tjerë.
Pavarësisht se pamjet tregonin qartazi se cilët ishin autorët, policia nuk identifikonte dot djalin e deputetit Rraja. Identifikimin e bënë mediat dhe duke detyruar policinë ta shpalli në kërkim. Kjo u lajmërua në një njoftim të dytë, po në datën 7 korrik.
Nga raportimi për sherr banal, të vendosur nën presion, drejtuesit e policisë së shtetit dërguan forcat e ndërhyrjes së shpejtë dhe ato speciale, RENEA në zonën e Niklës.
Dhe si në rastet kur kërkon të reklamojë suksesin, policia rreshtoi pas murit 4 të ndaluarit e tjerë. Por, ende nuk ka kapur djalin dhe vëllain e deputetit, i cili vijon të jetë në arrati.
Në total të prangosur janë 8 persona dhe në kërkim 6 të tjerë, si autorë të dhunës barbare ndaj dy kushërinjve Maja.
Mesditën e së shtunës Ministri i Brendshëm, Bledi Çuçi i shkoi në zyrë drejtorit të policisë së shtetit. Rreth orës 15:00, drejtoria e policisë së Tiranës, që ka në varësi komisariatin e Krujës, informon se është shkriri i gjithë zinxhiri komandues dhe zbatues i këtij komisariati.
Deri në emërimin e drejtuesve të rinj, përgjegjës për sigurinë në këtë zonë, është drejtori i policisë së Tiranës, Tonin Vocaj.
