Temperaturat ekstreme e kanë përballur Greqinë me pushtetin e zjarreve prej disa ditësh. Ishulli i Korfuzit është një tjetër zonë e përfshirë nga zjarri që nga mbrëmjen e djeshme, ndërsa flakët u përhapën me shpejtësi në Perithia në veri të ishullit.
Korfuzi është kthyer në ishullin e fundit grek që ka lëshuar urdhër për evakuim. Sipas mediave mësohet se autoritetet deri më tani kanë evakuar 17 fshatra, dhe roja bregdetare ka shpëtuar 59 persona që ndodheshin në plazhin e Nisakut që frekuentohet shumë nga turistët britanikë.
Ndërsa, në ishullin e Rodosit u evakuan mbi 19.000 persona në orët e fundit, pasi Greqia filloi dje operacionin më të madh të evakuimit të turistëve në 50 vitet e fundit.
Ministria greke e Punëve të Jashtme do të ngrejë një zyrë ndihmëse të dedikuar në Terminalin 1 të Aeroportit Ndërkombëtar të Rodosit, në mënyrë që turistët që humbën ose nuk morën dokumentet e udhëtimit përpara evakuimit, të kthehen pa probleme në vendet e tyre përkatëse.
Operatorët turistikë kanë urdhëruar gjithashtu fluturime çarter të zbarkojnë në Rodos pa pasagjerë në mënyrë që të marrin udhëtarët që dëshirojnë të largohen nga ishulli.
Në Rodos operojnë 16 ekipe zjarrfikësish në terren, me 266 persona dhe 49 automjete zjarrfikëse. Nga ajri operojnë 5 helikopterë për hedhjen e ujit dhe 10 aeroplanë, 7 grekë, një kroat dhe dy turq.
