Asambleja e Përgjithshme e Kombeve të Bashkuara (OKB) ka miratuar një rezolutë që dënon të gjitha aktet e dhunës ndaj librave të shenjtë si shkelje të së drejtës ndërkombëtare.
Kjo masë vjen pas djegieve dhe përdhosjeve të shumta në vendet evropiane të librit të shenjtë të myslimanëve Kuranit.
Liderët dhe politikanët myslimanë kanë theksuar se përdhosje dhe provokime të tilla nuk mbulohen nga ligjet për lirinë e shprehjes.
Asambleja e Përgjithshme e OKB-së, e përbërë nga 193 anëtarë, miratoi me konsensus rezolutën e hartuar nga Maroku.
Rezoluta shpreh keqardhje për të gjitha aktet e dhunës ndaj personave në bazë të fesë ose besimit të tyre, çdo akt të tillë të drejtuar kundër simboleve të tyre fetare, librave të shenjtë, shtëpive, bizneseve, pronave, shkollave, qendrave kulturore ose vende të adhurimit, si dhe të gjitha sulmet ndaj vendeve fetare, objekteve dhe faltoreve në kundërshtim me të drejtën ndërkombëtare.
Më 12 korrik, gjithashtu edhe Këshilli i OKB-së për të Drejtat e Njeriut me bazë në Gjenevë dënoi sulmet e fundit ndaj Kuranit pavarësisht votave të disa vendeve perëndimore kundër rezolutës.
