Në zyrat e avokatit të popullit do të kryhet procedura e filtrimit të parë të kandidatëve që vijnë nga radhët e avokatëve dhe të shoqërisë civile për qeveritë e gjyqtarëve dhe prokurorëve.
Procedura është përshkruar në mënyrë të hollësishme në një nga ligjet bazë të reformës në drejtësi, në ligjin për organet e qeverisjes së sistemit të drejtësisë.
Ligji është hartuar në mënyrë të tillë që t’u japë mundësi disa institucioneve kushtetuese dhe trupave të pavarura nga qeveria, të bashkëpunojnë dhe të kontrollojnë njëri-tjetrin në mënyrë që nga ky proces të fitojnë më të mirët.
Emrat dhe dosjet e kandidatëve nga radhët e avokatëve dhe shoqërisë civile tashmë janë dorëzuar në zyrat e Avokatit të Popullit dhe ky i fundit në bazë të ligjit do të kryejë verifikimin e parë të kushteve ligjore, bazuar mbi punën e një komisioni të posaçëm Ad-Hoc të përbërë nga: avokati i popullit; Sandër Simoni si kryetar i këshillit të emërimeve në drejtësi; avokati më i ri dhe më i vjetër në moshë nga lista e vetë kandidatëve; dhe një anëtar nga akademia e shkencave.
Pas filtrimit të emrave nëpërmjet një procedure që nuk lë vend për gabime, avokati i popullit ia kalon procesin dhe dosjet Kuvendit të Shqipërisë, ku do të hyjë në lojë sekretari i përgjithshëm.
Parlamenti ka për detyre të ngrejë një nën komision nga radhët e deputetëve të komisionit të ligjeve me 5 anëtarë, 3 nga shumica dhe 2 nga pakica, të cilët do të kryejnë përzgjedhjen përfundimtare.
Lista e dalë me dy emra avokatësh dhe një nga shoqëria civile për KLGJ dhe KLP, do t’i dërgohet parlamentit për votim.
Lista votohet në bllok, jo emër për emër dhe nëse nuk do të siguroje 84 vota në raundet e para të votimit, procesi nuk do të bllokohet, pasi do të quhet e miratuar lista e fundit e dorëzuar për votim.
Ky proces u krye në vitin 2017 pas krizës politike të pranverës mes socialistëve dhe demokratëve.
