Ministrja për Evropën dhe Punët e Jashtme, Olta Xhaçka, do të presë të premten në Tiranë në një vizitë zyrtare Ministren për Punët e Jashtme të Kanadasë, Melanie Joly, njoftojnë burime mediatike.
Vizita e saj në Shqipëri ëshjtë pjesë e turit të saj në Evropë, që përfshin Slloveninë dhe Maqedoninë e Veriut.
Kjo është vizita e dytë e një Ministri të Jashtëm kanadez në Tiranë, në harkun kohor prej 9 vitesh.
Vizita e Ministres Mélanie Joly në Shqipëri dëshmon për intensifikimin e shkëmbimeve dhe dialogut politik të nivelit të lartë ndërmjet dy vendeve.
Marrëdhëniet politike dhe diplomatike Shqipëri-Kanada janë zhvilluar akoma më shumë gjatë këtyre viteve, me ndikim të drejtpërdrejtë në fuqizimin e bashkëpunimit në fusha të interesit të ndërsjellë.
Të dy vendet ndajnë vlera të përbashkëta dhe si aleate në NATO janë të angazhuara për ruajtjen e paqes dhe sigurisë në nivel rajonal dhe ndërkombëtar.
Ministrja e Punëve të Jashtme e viziton Shqipërinë në një kohë kur roli dhe kontributi i Kanadasë në arenën ndërkombëtare është rritur ndjeshëm, ku spikat roli aktiv i Minsitres Joly.
Vizita e saj vjen në një kohë kur Shqipëria ka marrë për të dytën here presidencën e Këshillit të Sigurimit të OKB, mandati që nis pikërisht më 1 shtator, ditën e vizitës së zonjës Joly në Tiranë.
