Një juri e madhe speciale në Xhorxha rekomandoi ngritjen e akuzave kundër një senatori që është në detyrë aktualisht, si dhe dy ish-senatorëve amerikanë, të cilët prokurorët nuk i paditën.
Paneli po hetonte përpjekjet e supozuara të Donald Tramp për të ndryshuar rezultatet e zgjedhjeve të vitit 2020 në këtë shtet. Juria kishte votuar për të rekomanduar ngritjen e padive kundër senatorit të Karolinës së Jugut, Lindsi Graham (Lindsey Graham), si dhe 2 ish-senatorëve të Xhorxhas, Kelli Lofler (Kelly Loeffler) dhe Devid Perdu (David Perdue).
Raporti i pa redaktuar i panelit u publikua të premten. Ai ofron një pamje më të qartë të të menduarit të jurisë sekrete ndërsa hetonin nëse Tramp dhe aleatët e tij shkelën ligjin në Xhorxha gjatë zgjedhjeve të 2020.
Juria e madhe për qëllime speciale e përfundoi punën e saj këtë pranverë, por raporti i saj, deri tani, ishte publikuar vetëm pjesërisht. Prokurorja e Qarkut Fulton, Fani Uillis (Fani Willis), e krijoi jurinë speciale të madhe menjëherë pas zgjedhjeve presidenciale të vitit 2020 në SHBA.
Ndryshe nga një juri tipike e madhe, ky organ kishte edhe kompetenca hetuese. Dokumenti tregon se juristët rekomanduan akuza kundër secilit objektiv të hetimit të zonjës Uillis.
Juria e madhe e posaçme rekomandoi akuza edhe për figura të tjera kryesore rreth zotit Tramp, duke përfshirë ish-këshilltarin e tij të sigurisë kombëtare Maikëll Flin (Michael Flynn), avokatin dhe ndihmësin Boris Epshtain (Boris Epshteyn) dhe avokaten Sleta Mitçell (Cleta Mitchell).
Por asnjë nuk u padit përfundimisht. Juria e madhe speciale përfundoi punën e saj këtë pranverë dhe e dorëzoi raportin e saj përfundimtar në maj.
Pjesa më e madhe e saj ka mbetur e vulosur deri më tani. Zonja Uillis ngriti një juri të dytë, tipike të madhe këtë verë, e cila votoi për të paditur zotin Tramp dhe 18 bashkëpunëtorë të tjerë në një rast të shantazhit gjithëpërfshirës në fund të gushtit. Të gjithë janë deklaruar të pafajshëm për këtë rast.
