Milani ka triumfuar me shifrat 3-1 ndaj Kaljarit duke lënë pas zhgënjimin në derbi. Një sukses i rëndësishëm i arritur me një rotacion të pjesshëm të ekipit dhe me lojtarë që kanë dhënë përgjigjet që kërkonte Pioli nga të tijtë. Në vijimi, lexoni notat e “Eurosport” për paraqitjen e kuqezinjve.
SPORTIELO 6,5 – U përvëlua nga ajo e majtë nga distanca e afërt e Luvumbos, por i shkëlqyer te predha e Oristanios në fund.
FLORENZI 6 – E tërboi Piolin me disa krosime të gjata pa adresë, por më pas zhvilloi një ndeshje të kujdesshme dhe pa gabime në fazën mbrojtëse.
ÇAU 6,5 – I pastër në ndërhyrjet që bën dhe i kthjellët në pozicionimin taktik. Një ndeshje e mirë.
TOMORI 7 – Pak i çorientuar (jo për faj të tij) te goli i Kaljarit, por mori hak duke shënuar golin e përmbysjes së Milanit. Ishte i pari sezonal dhe me shumë peshë. Lovumba e vuri vazhdimisht në vështirësi, por Tomori e fitoi duelin në total.
HERNANDEZ 6,5 – Futet shpesh nga qendra duke i dhënë një dorë fazës sulmuese dhe flirtoi me golin, por Radunoviç bëri një mrekulli me majën e gishtave. (Nga min 84′ BARTEZAGI -Ndeshja e dytë me Milanin, por nuk ishte për notë).
LOFTUS-CHIK 6,5 – Anglezi vuajti më shumë sesa duhet, por pastaj u ul në “katedër” dhe shënoi një gol të mrekullueshëm me të djathtën.
ADLI 6 – Një pjesë e parë e mirë që u njollos nga ai gabim që solli golin e Lovumbës. Preku shumë herë topin dhe manovroi mirë, por nuk është edhe aq i shpejtë në mendim. Meriton sërish shansin.(Nga min 59′ POBEGA 6 – Hyri për t’i dhënë fuqi skuadrës, por jo gjithnjë është i kthjellët dhe humb topa të rrezikshëm).
REIJNDERS 7 – Më i lëvizshmi te Milani që në fillim të ndeshjes. Golat e Okaforit dhe të Tomorit lindin nga këmbët e tij. Ndoshta u zëvendësua shumë shpejt. (Nga min 59′ MUSAH 6 – Me Veronën luajti mesfushor krahu në të djathtë, ndërsa dje luajti në mes duke u bërë shkatërrues. E bëri mirë me përqendrimin e duhur).
ÇUKVUEZE 6 – Lufton për topin e parë sa mundet, por disa nga driblimet e tij nuk janë me nivel. I mungon vazhdueshmëria dhe në pjesën e dytë pothuajse zhduket fare. (Nga min 69′ LEAO 5,5 – Nuk hyri me mentalitetin e duhur në fushë dhe e mërziti Piolin me disa veprime sipërfaqësore).
OKAFOR 6,5 – Luan si qendërsulmues i vërtetë dhe lë shenjë me golin e parë si kuqezi. Lëviz shumë, por i mungon pak “ligësia” në 16 metrat e fundit. E megjithatë është shumë shpresëdhënës. Ishte ai që i shërbeu Loftus-Çikut topin për golin e 3-1. (Nga min 69′ ROMERO 6 – Vendoset në të djathtë duke bërë vetëm veprime horizontale pa dhënë asnjë vertikalizim).
Trajneri PIOLI 6,5 – Në Kaljari rrezikoi me një rotacion masiv, por fusha i dha të drejtë, si për rezultatin ashtu edhe për cilësinë e mirë të lojës. Reagim i shkëlqyer pas derbit dhe nuk ishte e thjeshtë.
