Presidentja e Kosovës Vjosa Osmani, në një intervistë për “Reuters” ka akuzuar Serbinë dhe presidentin Aleksandër Vuçiq, se janë ata që qëndrojnë pas sulmit në Veri të Kosovës.
Osmani është shprehur se qëllimi i Vuçiçit sipas saj, është që ta krijojë “Krimenë në Republikën e Kosovës”.
“Ajo që unë do t’i thosha presidentit Vuçiç është ndaloni ngatërresat me Kosovën. Kosova do ta mbrojë lirinë, pavarësinë dhe sovranitetin e saj me çdo çmim”, tha Osmani. Ata po përpiqen të krijojnë një model të Krimesë në Republikën e Kosovës, por ne absolutisht nuk do ta lejojmë të ndodhë kjo”, shtoi ajo.
Më tej Presidentja është shprehur se ekziston mundësi që sulme të tilla të përsëriten sërish, ndërsa kërkoi nga bashkësia ndërkombëtare që të bëjë gjithçka që Serbia të mos përkrahë grupe të tilla.
“Jam shumë e shqetësuar se sulme të tilla, qoftë edhe më të mëdha, mund të ndodhin në të ardhmen nëse Serbia nuk dënohet, para së gjithash për këtë akt terrorist agresioni”, tha ajo.
Kosova dhe Serbia kanë më shumë se një dekadë në bisedime për normalizimin e marrëdhënieve, në një proces ndërmjetësimi të udhëhequr nga Bashkimi Evropian. Në fillim të këtij viti ata ranë dakord për një marrëveshje të propozuar nga BE, por që atëherë ata nuk kanë qenë në gjendje të bien dakord se si ta zbatojnë atë.
Osmani tha se bisedimet mes të dyve nuk mund të vazhdojnë si më parë.
“Absolutisht nuk është më biznes si zakonisht”, tha ajo. “Ne kemi qenë viktima të një agresioni të Serbisë dhe të gjithë duhet ta trajtojnë atë si të tillë, edhe në qasjen e tyre ndaj Serbisë tani e tutje”, deklaroi ajo për Reuters.
Ndërkohë qeveria e Kosovës ka publikuar fakte që tregojnë se grupi ka qenë i trajnuar, i armatosur dhe ka marrë mbështetje të tjera nga qeveria e Beogradit dhe agjencitë e sigurisë.
Autoritetet e Kosovës thanë se policia luftoi me rreth 30 serbë të armatosur rëndë, të cilët sulmuan fshatin e Banjskës të dielën dhe u vendosën në një manastir ortodoks serb.
Policia e Kosovës gjatë operacionit Anti-terror, ka arritur të vrasë tre terroristë serbë, ndërsa ka arrestuar edhe tetë të tjerë si të dyshuar për përfshirjen në sulmin terrorist, gjashtë prej të cilëve janë liruar në mungesë të provave.
Përpos kësaj, organet e rendit ka sekuestruar edhe armatim, që sipas deklaratave të Kryeministrti Kurti, arrin vlerën e 5 milionë eurove.
