Xhela Sveçla i Vetëvendosjes ka thënë se qeveria e re, nën udhëheqjen e kryetarit të kësaj partie Albin Kurti, do të punojë për bashkim kombëtar shqiptar.
Këtë përgjigje ai e dha në Inteaktiv të KTV-së kur ka komentuar marshin që do të organizohet në Shqipëri më 28 nëntor.
Ai ka thënë se duhet të punohet tash që bashkimi të ndodhë më vonë.
“Ideja është e qartë, mesazhi i qartë. Me gjithë qenien tonë qëndrojmë prapa aspiratave të popullit tonë për t’u bërë bashkë. 28 Nëntori është festë e trefishtë për ne dhe dita simbol kur kjo aspiratë duhet të theksohej edhe më shumë. Do të punojmë për bashkim kombëtar. S’kemi thënë se do ta lëmë këtë anash. Nëse është e parealizueshme në të ardhmen imediate, mendoj më ndryshe se a do të jetë e realizueshme në të ardhmen më të largët. Nëse s’punojmë tash ajo s’do të ndodhë. Kemi pasur të burgosur politikë edhe nën mbretërinë serbo-sllave, edhe nën Jugosllavi, edhe nën Serbi, edhe kur drita në fund të tunelit ishte shumë larg, por ka pasur idealistë që punonin dhe sakrifikonin që të kemi edhe këso dite në Kosovë. Besoj se ka idealistë të cilët janë të gatshëm, të sakrifikojnë që bashkimi kombëtar të ndodhë. Është fat që numri i këtyre njerëzve është rritur jashtëzakonisht shumë. Këtë e tregojnë edhe sondazhet e fundit. Si tërësi është rritur. Në Kosovë është një rezultat i keqkuptimit për shkak të shkëmbimit të territorit sepse ka kundërshti të madhe për këtë proces e kur të përfundojë kjo vullneti do të shihet qartë”, ka deklaruar Sveçla.
