Kryeministri Edi Rama ka nxjerrë pamjet nga sallat ku do të mbahet samiti i 9-të i Procesit të Berlinit në Tiranë, ku do të mblidhen liderët e vendeve të Ballkanit Perëndimor dhe atyre të BE-së.
“Gati për Tiranën nesër, kryeqytetin e Evropës së Ballkanit, ku do të mbahet samiti i parë i Procesit të Berlinit jashtë kufijve të BE-së”, shkruan Rama në rrjetin social në Facebook.
Ndërkaq, më herët kryeministri Edi Rama bëri të ditur gjatë një konference për mediat me presidentin e Komisionit Evropian, Ursula von der Leyen, se “ky është i pari samit i procesit të Berlinit që organizohet jashtë kufijve të Bashkimit Evropian gjë që na bën krenarë dhe shprehim kënaqësinë tonë si vend pritës duke shfaqur të gjithë fuqinë e mikpritjes shqiptare, e cila besoj që po të kishte një konkurs në Evropë, do ta synonte me shumë dinjitet vendin e parë”.
Ai vuri në dukje gjithashtu se Shqipëria duhet të bëjë përpjekje për të arritur standardet e Bashkimit Evropian.
“Nga ana tjetër jemi shumë të vetëdijshëm se ka shumë gjëra të tjera për të cilat jo vetëm jemi larg vendit të parë, por duhet të bëjmë përpjekje për të arritur standardet e cilësisë dhe jetës si në BE.
Presidentja e Komisionit ka ardhur e para nga gjithë liderët e tjerë edhe sepse e ka çelur këtë moment me rrugën për të gjithë vajzat dhe djemtë e Shqipërisë dhe rajonit, të cilët dëshirojnë të kryejnë studime të thelluara në Kolegjin e Evropës në Tiranë.
Kolegji do të jetë i dyti në Evropë jashtë Belgjikës, pas atij që Komisioni vendosi të hapë në Poloni për të mbështetur valën e parë të mbështetjes për vendet aspiruese” u shpreh Rama.
