Deputeti demokrat, Oerd Bylykbashi, ka akuzuar Strukturën e Posaçme Antikorrupsion se po vepron me urdhra politikë dhe jashtë kushtetutës në raport me kryetarin e tij, Sali Berisha.
Berisha u akuzua të shtunën për veprën e korrupsionit pasiv nga SPAK, së bashku me ish-dhëndrin e tij Jamarbër Malltezi, si i paditur për dosjen e privatizimit të kompleksit të ish-klubit “Partizani”.
Bylykbashi kujtoi se Berisha gëzon imunitet nga Kuvendi me kredencialet prej deputeti.
“SPAK dërgon Policinë e Shtetit, e cila në fakt është organ i zbatimit të ligjit dhe jo i urdhrave politikë të Edi Ramës, duke kërkuar ekzekutimin e një mase që kufizon lirinë e një deputeti të republikës, zotit Sali Berisha, deputet i Parlamentit të Shqipërisë, kryetar i PD.
Kufizon lirinë e tij në kundërshtim me Kushtetutën. Tashmë është praktikë e konsoliduar e parlamentit të Shqipërisë se prokuroria duhet të kërkojë leje nga Kuvendi, i cili duhet të japë autorizimin jo vetëm për arrestin, por dhe çdo lloj mase tjetër kufizimi të lirisë të çdo shtetasi shqiptar, që është deputet.
Urdhri për detyrim paraqitje të deputetit Sali Berisha kufizon pikërisht këtë liri kushtetuese,” tha deputeti demokrat në një dalje për mediet.
Berisha u njoh më parë me masën e sigurisë “detyrim paraqitje”, e cila iu bë e njohur nga oficerët e policisë gjyqësore që e vizituan brenda në selisë së PD-së. Atij i është bllokuar pasaporta dhe nuk mund të udhëtojë jashtë vendit.
Malltezi, dhëndri i ish-kryeministri u arrestua pas mesdite në aeroportin e Rinasit dhe u dërgua në mbrëmje në Bllokun e Sigurisë në kryeqytet.
Në vitin vitin 2020 Taulant Balla, që në atë kohë mbante postin e kreut të grupit parlamentar të Partisë Socialiste paditi në SPAK, ish-kryeministrin Berisha, ish-ministrin e Mbrojtjes, Arben Imami, dhe dhëndrin e Berishës, Jamarbër Malltezin, si përfitues direkt të pronave të kompleksit të ish-klub “Partizani” si dhe drejtues të shtabit të ushtrisë shqiptare bashkë me administratorët e aksionerët e dy kompanive ndërtuese në kompleksin “Partizani”.
