Disa qindra pjesëtarë të komunitetit shqiptaro-amerikan po protestojnë para Selisë së OKB-së në New York.
Pak orë para seancës së Këshillit të Sigurimit të OKB-së për Kosovën, komuniteti shqiptaro-amerikan ka protestuar kundër terrorizimit dhe veprimeve luftënxitëse të Serbisë.
Në Këshillin e Sigurimit të OKB-së sonte do të bisedohet për Kosovën. Presidentja e Kosovës, Vjosa Osmani do t’i adresohet Këshillimit të Sigurimit.
Parullat si “Drejtësi për Afrim Bunjakun”, “Qëndroni kundër Terrorizmit”, “Serbia ka gjak në duar të veta. Ndaloni së mbrojtur kriminelët”, “Vuçiq = Marionetë e Putinit”, “Serbia përdor përdhunimin si armë”, janë shfaqur në protestë.
Në mesin e parullave të shumta ishte edhe ajo “Serbia është marionetë ruse” dhe po ashtu parulla ku kërkohej drejtësi për vëllezërit Bytyqi.
Shqiptaro-Amerikanët i bëjnë thirrje Shteteve të Bashkuara të Amerikës dhe komunitetit ndërkombëtar që të përdorin të gjitha mjetet e nevojshme për ta detyruar Serbinë që t’i ndalojë dhe të përmbahet nga veprimet dhe politikat që janë duke e minuar stabilitetin e Kosovës.
Në seancën e Këshillit të Sigurimit të OKB-së ndër çështjet kryesore që do të trajtohen do të jenë zbatimi i Marrëveshjes Bazë mes Kosovës dhe Serbisë (Bruksel, 27 shkurt) dhe Aneksi i Implementimit (Ohër, 18 mars), por edhe sulmi terrorist i paramilitarëve serbë në Banjë të Zveçanit – komunë e banuar me shumicë serbe – në veri të Kosovës.
Komuniteti shqiptaro-amerikan ka kërkuar ndër të tjera që Serbia dhe udhëheqësit e saj të mbahen përgjegjës, por edhe të përfshirët tjerë në “aktet e agresionit” kundër Kosovës të sillen para drejtësisë.
Presidentja e Kosovës, Vjosa Osmani, ka udhëtuar drejt New Yorkut, ku do të përfaqësojë Kosovën në OKB.
Osmani përmes një postimi në platformën “X” shkruan se sot do të flasë për zhvillimet e fundit në Kosovës, pas sulmit terrorist të Serbisë ndaj vendit tonë, transmeton Telegrafi.
“Do të trajtoj zhvillimet e fundit në vendin tonë, pas aktit të agresionit të Serbisë dhe do të rikonfirmoj angazhimin tonë për paqen dhe stabilitetin”, ka deklaruar presidentja.
Seanca e Këshillit të Sigurimit mbi raportin e Misionit të OKB-së në Kosovë (UNMIK) pritet të fillojë në orën 15:00 me kohën lokale të New Yorkut, kurse në ora 21:00 me kohën lokale të Prishtinës.
