JOQ News
Blendian Dalipi ndonëse po del gjithmonë e më shpesh në lajme për tenderat e tij të dyshimtë dhe abuziv, duket se nuk e vret mendjen fare. Jo vetëm që Blendiani nuk pyet për askënd, por me sa duket nuk pyet as për vetë SPAK-un. Kjo pasi vetëm në ditët e fundit drejtori i OSSH ka dhënë miliarda lekë tendera në procese tepër të dyshimta.
Skandali i radhës qëndron në një tender tjetër të organizuar nga Drejtoria Rajonale e OSSH Tiranë. Bëhet fjalë për procedurën me objekt “Blerje materiale dhe pajisje komutuese TM/TU për Kabina”. Fondi limit i tij është 193,933,667 lekë të reja pa TVSH ose gati 2.3 miliardë lekë të vjetra me TVSH. Tenderi mban numrin e referencës REF-79693-09-12-2023.
Por përse themi se kemi të bëjmë me një tender të dyshimtë? Shumë e thjeshtë. Duke shfletuar dokumentacion përkatës të tij, vihet re se kanë marrë pjesë vetëm dy garues, nga të cilët njëri nuk ka ofruar asnjë vlerë.
Kuptohet qartë se ftuesi ka qenë i ditur që në fillim dhe se firma që nuk ka dhënë vlerë, ka marrë pjesë sa për numër. Fitues siç pritej, është shpallur bashkimi i operatorëve që ka dhënë ofertë. Bëhet fjalë për kompanitë DULE në pronësi të Gazeli & Mitat Dule dhe MELA në pronësi të Mehdi Lala.
Ata kanë ofruar vlerën 189,815,600 lekë të reja pa TVSH ose rreth 2.3miliardë lekë të vjetra përfshirë TVSH. Dyshimet për një tender të manipuluar shtohen akoma më shumë kur vihet re se vlera fituese është sa 98% e fondit limit të tenderit.
