Barcelona ka festuar një fitore të rëndësishme ndaj Atletiko Madrid këtë të diel. Por në përfundim të saj, ka ndodhur një episod i cili ka shtyrë klubin katalanas të mendojë se një nga asistentët e gjyqtarit kryesor, kishte shkuar t’i “spiunonte” në dhomat e zhveshjes në mbyllje të duelit.
Asistenti i kryesorit Sançez Martinez, Raul Kabanero, ishte ai që kishte shkuar në pushimin e ndeshjes për t’i kërkuar lojtarëve që të ktheheshin në fushë, gjë që normalisht e bën delegati i sfidës dhe arsye pse ai nuk u lejua që të hynte brenda nga shërbimi i sigurisë së klubit.
E përditshmja spanjolle “AS” tregon edhe episodin e çuditshëm me të njëjtin gjyqtar në fund të sfidës. Kjo ndodhi pasi po diskutohej mes pjesëtarëve të stafit në tunelin e stadiumit se kryesori kishte dhënë disa faulle të padrejta në dëm të katalanasve pranë zonës. Në ato momente, Kabanero doli nga dhoma e zhveshjes e gjyqtarëve dhe iu drejtua asaj të katalanasve.
Sipas burimeve pranë klubit të Barcelonës, e ka bërë këtë për të dëgjuar ndonjë ankesë të mundshme të tyre për gjykimin. Por atje, ai ishte ndaluar nga përgjegjësi për shtypin i Barçës, Edu Polo, i cili e kishte pyetur se çfarë po bënte aty. “Punën time” i ishte përgjigjur gjyqtari i cili i kishte kërkuar të identifikohej. Në ato moment kishte kaluar Çavi i cili kishte pohuar se ai ishte zëdhënësi për shtyp i klubit, duke sjellë edhe largimin e gjyqtarit përsëri drejt dhomës që i rezervohet zyrtarëve të sfidës.
Një episod shumë i pazakontë që shoqëron ankesat që kanë prej disa javësh katalanasit ndaj gjyqtarëve, të cilët sipas tyre po veprojnë në dëm të klubit me vendimet që po marrin gjatë këtij sezoni.
