Ministria e Mbrojtjes me anë të një konference prezantoi aktivitetet dhe rezultatet e arritura gjatë vitit 2019.
Ministri në detyrë i Mbrojtjes, Rrustem Berisha, tha se gjatë këtij viti kjo Ministri ka arritur t’i realizojë të gjithë objektivat e saj.
Berisha tha se këtë vit kanë arritur t’i realizojnë tranzicionin e Ministrisë së Mbrojtjes, emblemat, simbolet dhe flamujt e njësive.
“Po ashtu pas rekrutimit të fundit që kemi pasur kemi arritur ta rrisim përqindjen e komunitetit jo shumicë, kemi arritur ta rrisim përqindjen e gjinisë femërore në FSK, 11 përqind komuniteti joshumicë deri 10 për qind. Po ashtu FSK-ja vazhdon të jetë institucioni më i besueshëm me përqindje më të lartë e më të theksuar”, tha Berisha.
Ai në këtë konferencë përmendi edhe bashkëpunimin me NATO-n dhe Shtetet e Bashkuara të Amerikës. Ndërsa komandanti i Forcës së Sigurisë së Kosovës, Rrahman Rama, tha se po e përmbyllin një vit si ushtri e Kosovës që me shekuj është pritur. Rama tha se janë duke punuar që pjesëtarët e ushtrisë të jenë në misione paqeruajtëse dhe në aktivitete të tjera.
