Joe Biden doli në skenë me gjithçka në rrezik: presidencën e tij, shpresat për rizgjedhje dhe jetën politike. Por nuk ia doli dhe aq që ta mbronte veten përballë dyshimeve të mëdha për gjendjen e tij shëndetësore e mendore, si dhe presionit për të lënë garën për Shtëpinë e Bardhë. Në fjalimin mbi 1 orë të gjatë në përmbyllje të samitit të NATO-s, Biden bëri dy gafa, duke ngatërruar presidentin e Ukrainës me armikun e tij, atë të Rusisë.
“Rusia nuk do të triumfojë në këtë luftë. Ukraina do ta fitojë atë dhe ne do qëndrojmë pranë në çdo hap të kësaj rruge. Tani ia kaloj fjalën presidentit të Ukrainës, që ka aq shumë guxim. Zonja dhe zotërinj, presidenti Putin… Jo presidenti Putin, por t’i do ta mundësh Putinit. Presidenti Zelenski. Jam aq i fokusuar ta mund të Putinin, sa më rri gjithmonë në mendje.”
Kjo konferencë ishte dalja e parë publike pa një fjalim të shkruar, pas debatit të humbur përballë Trump, duke bërë që demokratë të shumtë të kërkojnë tërheqjen nga gara. Presioni i gazetarëve për këtë temë, bëri që të ngatërrohej sërish.
“Shikoni, unë nuk do ta kisha zgjedhur nënpresidentin Trump që të ishte zëvendësi im, nëse ajo nuk do të ishte e kualifikuar për të qenë president. Ta nisim këtu. Së pari, fakti është se unë jam personi më i kualifikuar për të garuar për president. E kam mundur atë njëherë dhe do ta mposht sërish.”
Biden tha se nuk po lufton për emrin e tij, por vetëm për të përfunduar punën e nisur kur u betua si president në vitin 2021. Madje theksoi se ka marrë mbështetje nga liderë të shumë europiane për të mundur rivalin republikan në zgjedhjet e nëntorit. Por një prej tyre u rreshtua zyrtarisht me ish presidentin amerikan.
Kryeministri Hungarez, Viktor Orban, u takua në Florida me Donald Trump dhe folën për mundësinë e paqes, përmes një armëpushimi në Ukrainë. “Një tjetër ndalesë për misionin e paqes”, shkruajti lideri hungarez, në një referencë për vizitat e tij në Rusi dhe Kinë që shkaktuan zemërim në mesin e liderëve të vendeve anëtare të Bashkimit Europian.
