Filloristët shqiptarë nuk shfaqin interesim për të mësuar lëndën e maqedonishtes, edhe pse nga klasa e katërt kjo lëndë është obliguese.
Mësimdhënësit thonë se për këtë mos interesim kanë ndikuar shumë faktor, madje edhe politika e zhvilluar viteve të fundit. Mësuesja Enisa Abdullai, si arsye tjetër përmend edhe problemet në plan-program. Sipas saj ajo që s’ka kuptim është se fillimisht mësohen tekstet e pastaj shkronjat.
Ndërsa ekipi i Alsat qëndroi në këtë klasë, nxënësit bënin ushtrime në lexim. Thanë se shpesh herë detyrohen të mësojnë përmendesh për shkak se nuk kuptojnë asgjë nga ajo që është e shkruar.
“Besoj që është e vështirë më shumë se gjuhët tjera. Pse ndoshta fillon më vonë, për shembull anglishten e dimë më shumë se maqedonishten. Nëpër librat e maqedonishtes më shumë ka tregime, tekste se vizatime dhe kjo është problem për ne që ta kuptojmë më mire”, u shpreh Blerta Tahiri, nxënëse.
“Për shembull, në gjuhë angleze ka fotografi dhe tregon përafërsisht për çka bëhet fjale edhe pa u mundu me lexuar e kuptojmë nga ana e fotografive. Kurse në gjuhën maqedonase kemi mungesë të fotografive. Ka më shumë tekste, poezi dhe gramatikë”, tha Enisa Osmani, nxënëse.
Për shkak të ankesave të shumta për plan-programet e kësaj gjuhe, Byroja për Zhvillimin e Arsimit ka nisur aktivitete me mësimdhënësit për ndryshimin e plan-programeve ekzistuese./Alsat/
