Për të përmirësuar dhe lehtësuar kriteret për akses në tregun e punës është publikuar për konsultim publik një projektligj që rishikon parimet e përgjithshme për punësimin e të huajve në Shqipëri.
Sugjerohet që të hiqet leja e qëndrimit për shtetasit e Bashkimit Europian në Shqipëri. Një pikë që është rishikuar lidhet me të drejtën e shtetasve të vendeve të Bashkimit Evropian dhe anëtarëve të familjeve të tyre për të lëvizur dhe banuar lirisht brenda territorit të Republikës së Shqipërisë.
Po ashtu në projektligj parashikohen lehtësi të procedurave edhe për të huajt që duan të marrin leje qëndrimi në Shqipëri për arsye punësimi.
Tashmë kërkesa për “Lejen Unike” mund të bëhet nga vetë i huaji, nga punëdhënësi, agjencia e punësimit ose subjekt i autorizuar dhe lëshimi i “lejes unike të qëndrimit” duhet të realizohet deri në 4 javë.
Gjithashtu në projektligj kërkohet edhe shfuqizimi i kategorisë “leje unike” si investitorë.
Leja unike e mëparshme për investitorë do të jetë tashmë një leje qëndrimi, e cila nuk do të kërkojë miratim nga AKPA.
Në draft është rregulluar më tej edhe dispozitat për “Leje Unike” për punësim stinor, duke parashikuar se pas vitit të parë të punës, punëdhënësi ka të drejtë të bëjë kërkesë për të njëjtin të huaj me kusht që periudha e shkëputjes të jetë 6 muaj. Gjate vitit te kaluar numri i të huajve me leje qëndrimi në Shqipëri rezultoi 21.460 banorë.
