Champions League garanton takime titanësh dhe këtë të mërkurë. Padyshim që këtë mbrëmje vëmendja do jetë në Katalonjë, aty ku Barcelona do përballet me Bayern Munich.
Tekniku Hansi Flick përballë të kaluarës që disa vite më parë si pjesë e bavarezëve i shkaktoi Barcelonës humbjen turpëruese 8-2, një kujtim i hidhur për të gjithë tifozët katalanas. Edhe historia e përballjeve direkte mes dy skuadrave nxjerr favoritë bavarezët, por Barça e Hansi Flick këtë sezon është një “kockë” e fortë.
“Le t’ia lëmë historisë të shkuarën. Tani jemi këtu të gjithë së bashku duke punuar ditë për ditë për të bërë diçka të mirë për Barcelonën. Lojtarët janë shumë të lidhur mes tyre. Mjafton t’ju kujtoj momentin e futjes në fushë të Gavit kundër Seviljes. Ishte një emocion i jashtëzakonshëm. Kjo është rruga që kemi zgjedhur, të punojmë fort, sepse vetëm kështu mund të jemi të suksesshëm”, tha Hansi Flick.
“Ka trajnerë që kanë bërë shumë për Bayern dhe Hansi Flick është një prej tyre. Sigurisht, do të jetë një ndeshje e veçantë për të dhe për ne. Në fund, ne të dy duam të fitojmë. Nuk mund të parashikojmë se çfarë do të ndodhë, por me siguri që të dyja skuadrat i pret një përplasje gjigante dhe do të bëjmë maksimumin për të arritur një rezultat pozitiv ndaj Barcelonës”, tha Kompany.
Ndeshje interesante është dhe ajo mes Spartës së Pragës dhe Manchester City, dy ekipe që ende nuk e kanë ndjerë shijen e humbjes në Ligën e Kampioneve dhe të dyja janë me 4 pikë në renditje. Ekipi çek pritet që të hedhë në fushë që nga minuta e parë dy shqiptarë si Qazim Laçi dhe Albion Rahmani, ndërsa në stol do të jenë Tuci dhe Krasniqi.
Inter do të përballet me zvicerianët e Young Boys, në Bernë. Mesfushori i kombëtares shqiptare Kristjan Asllani nuk do të jetë në dispozicion të Simone Inzaghit, kjo për shkak të një goditjeje që 22-vjeçari ka marrë në stërvitjen e zikaltërve, ndërsa në dyshim janë Çalhanoglu dhe Acerbi, që ia vështirësojnë dhe më shumë detyrën Interit.
Ndeshje e fortë është dhe ajo mes Leipzig dhe Liverpool. Leipzig ende nuk ka regjistruar fitoren e parë në këtë edicion, ndërsa “The Reds” marshojnë në krye me 6 pikë të plota. Në sfidat e tjera, Atalanta përballet me Celtic, Atletico Madrid pret Lille, Benfica përballet me Feyenoord, ndërsa Salzburg luan me Dinamon e Zagrebit.
