Presidenca ukrainase u shpreh e sigurt që Teherani do të kryejë një hetim të shpejtë dhe objektiv, pas pranimit se kishte goditur gabimisht një Boeing ukrainas.
Specialistët në Iran kanë patur akses në të gjitha fotot dhe videot dhe në informacionet e tjera të nevojshme për të analizuar procesin e ndërmarrë në Teheran.
“Në bazë të informacioneve të mbledhura, (…) ne kemi mjaftueshëm të dhëna për të kuptuar që hetimi do të jetë i shpejtë dhe objektiv”, sipas një komunikate të presidencës.
Presidenti ukrainas dhe homologu iranian do të zhvillojnë sot një bisedë telefonike pasi Teherani pranoi se kishte goditur gabimisht Boeing 737 të kompanisë “Ukraine Airlines International”.
“Presidenti ukrainas, Volodymyr Zelensky do të zhvillojë sot një bisedë telefonike me presidentin e Republikës islamike të Iranit, Hassan Rohani, pas të cilës ai do t’i drejtohet popullit ukrainas”, theksoi presidenca ukrainase në një komunikatë.
Presidenti ukrainas, Volodymyr Zelensky kërkoi sot ndëshkimin e fajtorëve nga ana e Iranit, që pranoi se kishte goditur gabimisht një avion të linjës ukrainase duke shkaktuar 176 të vdekur.
“Ne presim nga Irani (…) që fajtorët të dalin para drejtësisë, të na dëmshpërblejë dhe rikthimin e trupave të viktimave”, shkruan Zelensky në Facebook./
