Të paktën 12 emigrantë humbën jetën pas mbytjes së anijes së tyre në detin Jonian, që transportonte 50 persona, njoftuan rojat bregdetare greke.
“Rreth 12 trupa u gjetën. Operacionet e kërkim-shpëtimit vazhdojnë”, deklaroi një zyrtar i rojave bregdetare duke shtuar se 20 persona ishin shpëtuar.
Anija, me rreth 50 persona në bord, u fundos në brigjet e ishullit Paxos, ndërkohë që po përpiqej të mbërrinte në brigjet e Italisë.
“Gjashtë patrulla të rojave bregdetare dhe dy helikopterë u angazhuan në operacionet e shpëtimit”, sipas autoriteteve.
Mijëra emigrantë kanë humbur vitet e fundit në Mesdhe, duke u bërë kështu kalimi detar më i rrezikshëm në botë.
Në vitin 2019, Organizata Ndërkombëtare e Migracionit (OIM) regjistroi 1283 të vdekur në Mesdhe./