Presidentja e Kosovës, Vjosa Osmani, gjatë një ligjërate para studentëve dhe stafit akademik të fakultetit juridik të Universitetit Dalhousie në Halifax të Kanadasë, ka thënë se fuqia më e madhe e Kosovës janë partnerët e saj.
Vjosa Osmani theksoi po ashtu se ndër aleatët më të rëndësishëm, janë Shtetet e Bashkuara të Amerikës dhe Kanadaja, shkruan A2 CNN.
“Në vitin 1999, kur NATO na erdhi në ndihmë, Presidenti i Shteteve të Bashkuara atë natë, para së gjithash, ai i shpjegoi popullit amerikan se sa afër është Kosova me Greqinë dhe me Italinë, ne jemi vetëm disa orë larg. Do të thotë që lufta mund të zgjerohet në vende të tjera të Evropës dhe një Evropë që nuk është e sigurt, do të thotë që sigurisht do të ketë efekte shumë më të gjera në sigurinë globale. Nuk mund të ketë kurrë Shtete të Bashkuara apo Kanada të sigurt nëse nuk ka Evropë të sigurt. Dhe së fundi, më e rëndësishmja, mendoj se ka të bëjë me vlerat, dhe për mua kjo nuk është vetëm retorikë. Jam rritur si fëmijë i luftës. Në një shoqëri që nuk e kishte njohur kurrë paqen në historinë e ekzistencës së rajonit tonë. Mirëpo bota na erdhi në ndihmë”, deklaroi Osmani.
Presidentja e Kosovës foli edhe për vuajtjet e shqiptarëve të Kosovës gjatë luftës dhe të arriturat e saj deri sot. Sipas saj, fitimi i luftës në Ukrainë do të përcaktojë fatin e të gjithëve në Ballkan dhe Botë.
“Përfaqësimi i një vendi të ndërtuar nga hiri, një shoqërie të shkatërruar nga lufta që sot është demokracia më e fortë në rajon, kampion i shtetit ligjor, dhe një vend që ofron ndihmë për ata që kanë nevojë. Sepse kur kishim nevojë, demokracitë e botës nuk mbyllën sytë para vuajtjeve tona, por na erdhën në ndihmë. Ne besojmë fuqishëm se fitimi i luftës në Ukrainë do të përcaktojë fatin e të gjithë neve. Jo vetëm sepse është kaq e qartë se Putini dëshiron të zgjerojë konfliktin. Jo vetëm sepse nuk do të përfundonte vetëm me Ukrainën, sepse padyshim që ata kanë pretendime territoriale dhe duan të marrin territoret e të gjithëve përreth tyre, dhe ata i shohin fqinjët e tyre si shtete të përkohshme, por sepse nuk duhet ta lëmë një ngucakeq të fitojë, edhe për arsyen se shpërblimi i agresorit me territorin e viktimës nuk ka çuar kurrë në historinë e njerëzimit drejt paqes afatgjatë, asnjëherë”, shtoi Osmani.
Ajo para studentëve theksoi po ashtu se populli i Ukrainës është ai që përfundimisht do të fitojë, sepse në fund të fundit po, është e rëndësishme që të gjithë po ndihmojnë, mirëpo ajo që ka vërtet rëndësi është qëndrueshmëria e njerëzve.
