Një arsenal të madh armësh sekuestroi policia e Kosovës gjatë bastisjeve në veri të vendit, pas sulmit terrorist të mbrëmjes së të premtes në kanalin Ibër-Lepenc.
Drejtori i Policisë së Kosovës, Gazmend Hoxha, në konferencën e jashtëzakonshme për media tregoi se u kontrolluan 10 lokacione.
Aty u gjetën mbi 200 uniforma ushtarake, gjashtë zolla nga të cilat tri janë të përdorura, tri granata dore, dy armë automatike AK-47, një revole, municione të kalibrave të ndryshëm, pjesë të armëve, fitila ndezës për inicim të lëndëve plasëse, helmeta ushtarake e maska dhe thika.
“Si rezultat i zbatimit të këtyre kontrolleve janë sekuestruar prova të shumta materiale që mund të ndërlidhen me këto raste apo edhe me raste të tjetra që janë duke u trajtuar nga Policia e Kosovës. Si në vijim, janë sekuestruar mbi 200 uniforma ushtarake, 6 raketa hedhës dore apo zolla, 3 granata dore, 2 armë AK47, 1 revole, municion të kalibrave të ndryshëm, pjesë të armëve, fitila ndezës për inicim të lëndëve plasëse, helmeta ushtarake, maska, thika, të holla në euro dhe dinarë dhe pajisje të tjera. Po ashtu në një rast tjetër të dinarë sot në Zveçan, policia ka gjetur të fshehura një sasi të konsiderushme të armatimit”, tha Hoxha.
Në mesin e armatimeve të konfiskuara shihet edhe një emblemë e UÇK-së, që ngre dyshime të forta se në operacionet terroriste që ishin planifikuar të kryheshin në veri, ishin paraparë edhe skenarë për përfshirjen e Ushtrisë Çlirimtare të Kosovës.
“Shumica e personave të cilët sot është kryer kontrolli në pronën e tyre, janë persona të dyshimtë të lidhur me mbrojtjen civile dhe që nga qeveria e Republikës në vitin që vitin që shkoi është shpallur organizatë terroriste. Mund të ketë implikime dhe lidhje po ashtu edhe me terroristin Radoiçiç”, theksoi Hoxha.
Ndërkohë, ministri i Brendshëm Xhelal Sveçla tha se shumica e arsenalit ushtarak janë prodhime serbe dhe lidhen me organizatën e shpallur terroriste, Brigada e Veriut.
“Një pjesë e tyre janë edhe pjesë e strukturave tashmë të njohura si mbrojtja civile apo Brigada e Veriut. Ata janë të mbështetur, të financuar, të trajnuar dhe të shtyrë nga Serbia me qëllim të destabilizimin e Republikës së Kosovës. Një pjesë e madhe e tyre janë ekskluzivisht ushtarake të cilat nuk gjenden lehtë as në tregun e zi e mos të flasim për treg legal. Eksplozivi i përdorur mbrëmë është material i cili pothuajse është i pamundur të gjendet përveçse nëse nuk është i furnizuar drejtpërdrejtë nga magazinat e ushtrisë”, tha Sveçla.
