Frank Wisner, ish diplomati amerikan që u angazhua në negocimin e statusit të Kosovës pas luftës, është shuar në moshën 86-vjeçare.
Lajmi raportohet gjerësisht nga media si Nju Jork Times dhe Uashington Post, ndërsa bëhet e ditur se vuante nga kanceri në mushkëri.
“Në vitin 2005, administrata e presidentit George W. Bush, e emëroi atë si Përfaqësues Special në Bisedimet për Statusin e Kosovës, të cilat përfunduan me pavarësinë e Kosovës në vitin 2008”, shkruajnë këto media duke sjellë në pah sukseset e tij diplomatike.
Wisner ishte një mbështetës i madh i Kosovës dhe në një deklaratë të tij në qershor të 2007-ës ai shprehej: “Unë e pranoj se procesi për arritjen e pavarësisë po zgjat më shumë sesa do të kishim dashur, secili prej jush ose ne amerikanët. Por është e rëndësishme që pavarësia të arrihet si rezultat i një rezolute të Këshillit të Sigurimit që do të hapë rrugën për njohjen dhe pranimin tuaj në NATO dhe në Bashkimin Europian”.
Përveç misionit që solli pavarësinë e Kosovë, ai drejtoi ambasadat e SHBA-së në mbarë botën, duke nisur nga India, Egjipti, e deri në Filipine. Ai ka shërbyer në të dyja administratat, republikane dhe demokrate, duke sjellë një stil të përbashkët në promovimin e interesave amerikane.
