Në Lucern, një grua me shtetësi kosovare akuzohet se ka mashtruar zyrën e Pensioneve të Invaliditetit (IV). Akuza: Për të përfituar para nga shteti, ajo pretendonte me këmbëngulje se ishte e sëmurë rëndë.
Ajo ankohej se nuk ndihej fare mirë. Probleme me zemrën, dhimbje shpine dhe probleme psikologjike. Si rrjedhojë, gruaja 59 vjeçe në kantonin e Lucernit ka marrë pension invaliditeti për 8 vjet.
Kur mjekët dhe ekspertët ekzaminonin gruan, burri i saj ishte gjithmonë aty. Ai u përgjigjej pyetjeve dhe përshkruante situatën e pafuqishme dhe të vështirë të gruas së tij. Sipas tij, pa mbështetjen e tij ajo nuk mund të bënte praktikisht asgjë, shkruan ‘Zentralplus’. Nuk ishte në gjendje as të vishej as të kujdesej për veten.
Por, me sa duket e gjitha është një gënjeshtër e madhe! Kështu, zyra ndaloi pagesat. Nuk dihet saktësisht se si është zbuluar çifti.
Sidoqoftë, kosovarja tani duhet të përgjigjet para Gjykatës Penale të Luzernit. Prokurori publik e akuzon atë për mashtrim. Akuza thotë se ajo thjesht ka simuluar ankesat dhe vuajtjet për të marrë pensionin e plotë plus pensionin për fëmijët. Gjithsej ka përfituar 173.000 franga.
Fakti që ajo ka mashtruar zyrën e pensioneve dhe invaliditetit nuk është aspak një rast i izoluar. Ka pasur përpjekje edhe më të ‘guximshme’ në këtë drejtim, në të kaluarën.
Për të parandaluar këto keqpërdorime, Zvicra ka lejuar me ligj përdorimin e detektivëve socialë.
Por kur i përdor zyra detektivët socialë? Nëse kanë dyshime dhe të dhëna, kompanitë e sigurimeve shoqërore mund të iniciojnë mbikëqyrjen sociale (detektivët socialë). ‘Ndërmjet viteve 2010 dhe 2016, zyra ka sqaruar dyshimin për abuzim të sigurimeve në një mesatare prej rreth 2,400 raste në vit, nga të cilat në rreth 150 raste është përfshirë edhe vëzhgimi’ shkruan Zyra Federale e Sigurimeve Shoqërore (BSV) në faqen e saj të internetit.
Që nga viti 2019, pas një ndryshimi në ligj, detektivët, për tu aktivizuar, kanë nevojë për një ‘leje për të kryer mbikëqyrje por duke respektuar kriteret për mbrojtjen e privatësisë dhe përdorimin e pajisjeve teknike’.
