Ish-ambasadori i SHBA-së në Shqipëri, Donald Lu, është larguar nga posti i tij si Asistent Sekretar i Shtetit për Çështjet e Azisë Jugore dhe Qendrore, me përfundimin e mandatit më 17 janar 2025.
Departamenti Amerikan i Shtetit e konfirmoi largimin e tij, duke theksuar se ky është një tranzicion i zakonshëm dhe jo një shkarkim. Megjithatë, ky zhvillim mund të shihet si një fitore për kundërshtarët e tij politikë, përfshirë ata në Pakistan dhe Shqipëri, ku Lu la gjurmë të thella dhe shpesh të diskutueshme.
Donald Lu u bë një figurë e përfolur në politikën shqiptare gjatë kohës që shërbeu si ambasador i SHBA-ve në Tiranë nga 2015 deri në 2018. Ai kishte përplasje të ashpra me ish-kryeministrin Sali Berisha dhe aktorë të tjerë politikë, sidomos në kontekstin e Reformës në Drejtësi. Lu kërcënoi hapur se do të shpallte “non grata” ata politikanë që nuk votonin pro reformës, një lëvizje që u pa si një ndërhyrje e drejtpërdrejtë dhe agresive në punët e brendshme të vendit. Berisha ka deklaruar publikisht se ish-ambasadori amerikan ka qenë një nga figurat kyçe pas shpalljes së tij “non grata” nga SHBA, duke e akuzuar për një përpjekje të qëllimshme për ta eliminuar politikisht.
Ndërkohë, në Pakistan, Donald Lu u përfshi në një tjetër skandal të madh të njohur si “Cipher Gate”. Ish-kryeministri Imran Khan e akuzoi atë për ndërhyrje të drejtpërdrejtë në rrëzimin e tij nga pushteti në mars të vitit 2022, duke pretenduar se një bisedë mes Lu dhe ambasadorit pakistanez në SHBA ishte prova e një konspiracioni të drejtuar nga Uashingtoni. Këto akuza ndezën protesta dhe fushata të forta kundër tij, me mbështetësit e PTI-së që kërkonin dorëheqjen e tij. Edhe pse administrata amerikane mohoi çdo përfshirje, kjo çështje mbeti një njollë e madhe në mandatin e tij.
Largimi i Donald Lu-t nga Departamenti i Shtetit shënon fundin e një epoke të mbushur me polemika dhe ndërhyrje të forta në politikat e brendshme të vendeve ku ai ka operuar. Për shumë figura politike në Shqipëri dhe Pakistan, kjo është një lëvizje e vonuar që shënon një çlirim nga ndikimi i tij i diskutueshëm. Megjithatë, një gjë mbetet e qartë: emri i Donald Lu do të kujtohet gjatë si një diplomat që nuk hezitoi të përdorte presionin politik në emër të interesave amerikane, shpesh duke sfiduar parimet e sovranitetit dhe demokracisë lokale.
