Pas largimit të Donald Lu nga diplomacia amerikane, lajm që është konfirmuar nga Departamenti Amerikan i Shtetit, duket se edhe isha ambasadorja tjetër e SHBA-ve në Shqipëri, Yuri Kim, ka pësuar të njëjtin fat.
Kim mbante deri pak kohë më parë detyrën e Zëvendës Ndihmës Kryesore të Sekretarit të Shtetit për çështjet Evropiane dhe të Aurazizë, si një diplomate karriere.
Mirëpo në faqen zyrtare të DASH, në këtë departament, së fundmi figurojnë vetëm emrat e Bono , Louis L., Huck, Joshua, Coulter Sonata, Christoper Smith, Hudson-Dean, Sharon dhe Courtney E. Austrian.
Emri i Kim nuk figuron më në listën e departamentin ku ishte e ngarkuar me detyra më parë.
Gjithashtu emri i saj është hequr bashkë me jetëshkrimin përkatës nga faqja e DASH.
Nuk dihet nëse ky është një largim përfundimtar i saj nga diplomacia amerikane apo nga detyra që mbante, por duket serioz fakti që emri i saj është fshirë totalisht nga faqja e Departamentit Amerikan të Shtetit.
Donald Trump ishte zotuar që në mandatin e tij të parë se do ta luftonte “Deep State” që ndodhej sipas tij në Departamentin e Shtetit, një strukturë që sipas tij luante në favor të interesave të errëta të disa grupimeve të caktuara influente në qarqet politike dhe ekonomike globale.
Me këtë Trump shënjestronte kryesisht miliarderin George Soros, sipas tij strumbullari i të gjitha vendimmarrjeve të rëndësishme të demokratëve amerikanë.
Si Lu, ashtu edhe Kim, luajtën një rol të rëndësishëm në zbatimin e reformës në drejtësi në Shqipëri. Që të dy patën përplasje të ashpra me Berishën, i cili ka akuzuar Donald Lu, si personin që punoi që ai të shpallej “non grata” nga administrata Biden.
Berisha e ka akuzuar shpesh me tone të ashpra edhe Yuri Kim. Tashmë që të dy duket se janë larguar nga kupola e diplomacisë amerikane, ndërkohë që “non grata” e Berishës mbetet ende, së bashku me shumë dilema se cili do të jetë efekti real i uraganit “Trump” në politikën shqiptare.
