Bashkimi Europian dhe Mbretëria e Bashkuar kanë arritur një marrëveshje 12-vjeçare mbi aksesin e anijeve europiane të peshkimit në ujërat britanike, raporton BBC. Qeveria e Mbretërisë së Bashkuar argumenton se ka siguruar nga ana tjetër përmirësime të të drejtave të saj të tregtisë për produktet ushqimore dhe agrokulturore drejt Bashkimit Europian.
Sipas asaj që raporton Reuters, dokumenti i rënë dakord paraprakisht mes palëve po aprovohet nga të 27 qeveritë e shteteve anëtare të BE-së.
Marrëveshja mes dy palëve vjen para një samiti që do të mbahet në Londër sot ku të pranishëm do të jenë Presidentja e Komisionit Europian, Ursula von der Leyen, Presidenti i Këshillit Europian, Antonio Costa dhe Përfaqësuesja e Lartë për Politikën e Jashtme, Kaja Kallas. Ky takim ka për qëllim që të “rivendosë” marrëdhëniet mes Britanisë dhe BE-së, sidomos pas daljes së saj në 2020-ën me të ashtuquajturën Brexit.
Brukseli e kërkonte prej kohësh një marrëveshje, pasi ajo ekzistuese skadonte vitin e ardhshëm.
Por kjo nuk ka qenë e vetmja pikë që është diskutuar mes dy palëve. Ja disa nga pikat që kanë qenë duke u negociuar:
Pakti për sigurinë: Në bisedimet e hershme për Brexit, ka pasur bisedime edhe për një Partneritet për Sigurinë dhe Mbrojtjen, por nuk pati dakordësi për asgjë. Por prej muajsh ka pasur diskutime për një pakt të ri mbi sigurinë Britani-BE dhe siç raportojnë mediat ndërkombëtare pritet që të jetë pjesë kyçe e marrëveshjes sot.
Lëvizja e lirë të rinjve: BE-ja ka sugjeruar një “skemë për lëvizjen e lirë të të rinjve” nga moshat 18 deri në 30-vjeç. Sipas kësaj skeme atyre do t’u lejohet qëndrimi deri në 4 vite. Qeveria konservative i ka thënë “jo” një skeme të tillë, por ndryshe mendojnë laburistët. Ata mendojnë se një skemë e tillë e lëvizjes, por e kontrolluar mund të jetë ndihmuese në këtë rast.
