Sipas parashikimeve, deri në fund të këtij viti, kursi i këmbimit nuk do të jetë aq i fortë sa në 2024, pra lëvizjet e kursit do të jenë më të buta, euro nuk do të zhvlerësohet aq shumë kundrejt lekut sa në vitin që lamë pas. Kështu është shprehur Erald Themeli, Drejtori i Politikës Monetare në Bankën e Shqipërisë, teksa theksoi se efekti i kursit të këmbimit në mbajtjen nën kontroll të inflacionit nuk do të jetë aq i madh këtë vit.
“Theksoj që gjatë vitit 2024, ne kemi pasur një nivel inflacioni lehtësisht nën objektivin e Bankës Qendrore, pra niveli mesatar ka qenë 2.2% dhe në një masë të madhe kjo lidhet me efektin frenues që ka sjellë forcimi i shpejtë i kursit të këmbimit gjatë vitit 2024. Për vitin 2025 e në vazhdim, pavarësisht problematikave që ka parashikimi i kursit të këmbimit, ne presim një ecuri më të balancuar të këtij treguesi në raport me zhvillimet që janë vënë re dy vitet e fundit, që do të thotë që edhe efekti frenues në inflacion që kemi pasur në 2023 dhe 2024, nuk do të jetë më aq i fortë në të ardhmen”.
Ekonomia shqiptare vijon të ketë trende pozitive zhvillimi, të shfaqura në drejtim të rritjes ekonomike, por edhe në drejtim të inflacionit të ulët dhe nën kontroll, nivelin e ulët dhe në rënie të borxhit publik, si dhe treguesit në përmirësim të tregut të punës.
“Ritmi i rritjes ekonomike për vitin 2024 qëndroi në nivelin 4%, i ushqyer në një masë të madhe nga zgjerimi i konsumit familjar dhe investimeve të përgjithshme në ekonomi, qoftë në sektorin publik, qoftë në sektorin privat. Zgjerimi i kërkesës së brendshme pasqyron si bilance të shëndosha financiare të ekonomisë shqiptare, ashtu edhe kushte të favorshme të financimit, që do të thotë niveli i normave të interesit dhe kushtet e përgjithshme të kreditimit, kanë favorizuar një rritje të shpejtë të kredisë, të cilat kanë mbështetur zgjerimin e konsumit dhe investimeve.
Ne vazhdojmë të kemi një kontribut të shtuar pozitiv nga rritja e eksporteve të turizmit, sic dihet tashmë Shqipëria është shndërruar në një destinacion të rëndësishëm turistik dhe ky profil i kërkesës agregate ose profil shpenzimesh në ekonomi, është pasqyruar në zgjerim të aktivitetit, kryesisht të sektorit të shërbimit dhe ndërtimeve, ndërkohë sektori i industrisë dhe bujqësisë, sikurse e kemi evidentuar vazhdojnë të kenë një ecuri më të ngadaltë, sepse kanë probleme specifike të zhvillimeve të tyre”.
Themeli u shpreh gjithashtu se konteksti global vijon të shfaqë pasiguri të larta që vijnë nga tensionet gjeopolitike, por gjithashtu edhe nga lufta tregtare dhe planet për vendosjen e tarifave në nivele të ndryshme ndërmjet blloqeve konkurrente gjeopolitke, gjë që do të ishte një goditje negative për ekonominë shqiptare. Nëse këto goditje do të materializohen, ato do të pasqyrohen në qëndrimin e politikës monetare.
