Në Dubai ndodhen plot 27 rrokaqiej që ofrojnë çdo lloj luksi dhe rehatie. Burj Khalifa, 829 metra, është ndërtesa më e lartë në botë dhe më e famshmja në horizontin e Dubait.
Por midis morisë së rokaqiejeve, aty spikat edhe Kulla Cayan. Investimi për këtë ndërtesë arriti në 1 miliard euro. Ndërtimi zgjati gjashtë vjet, duke kulmuar në vitin 2013, vitin në të cilin u hap rrokaqielli magjepsës, ndryshe nga çdo tjetër në Dubai.
Megjithatë, shkalla e ulët e shfrytëzimit është problemi kryesor me të cilin është përballur kjo ndërtesë deri më sot. Raporte të ndryshme bazuar në tregun e pasurive të paluajtshme në Dubai treguan se shfrytëzimi mezi ka tejkaluar 65% që nga hapja e saj.
Çmimet e larta, së bashku me kostot e larta të mirëmbajtjes, janë disa nga faktorët që ndikojnë më shumë në shkallën e ulët të zënies së ambienteve të treguar në këto raporte, siç zbulohet nga portali CPG.
Me formën e një spiraleje, që rrotullohet 90° dhe arrin një lartësi prej mbi 300 metrash, Cayan është ndërtesa më e lartë e përdredhur në botë.
Ajo i ofron të gjitha llojet e ambienteve, duke përfshirë më shumë se 60 apartamente banimi, të cilat mund të kenë një, dy, tre ose edhe katër dhoma gjumi.
Jashtë zonës së banimit, ka pishina të jashtme, një palestër, një qendër kujdesi për fëmijët, një spa dhe një fushë tenisi. Ekziston gjithashtu një platformë shikimi, dyqane me pakicë dhe gjashtë kate parkim.
