Avokati i njohur, Arianit Koçi, ka organizuar sot një protestë të pazakontë para ndërtesës së Kuvendit të Kosovës, duke sjellë katër gomerë në hapësirat përreth Parlamentit. Koçi tha se gomerët përfaqësojnë kokëfortësinë dhe papërgjegjshmërinë e klasës politike, e cila po pengon konstituimin e Kuvendit.
“Këta katër gomerë janë simbol i bllokimit të jetës demokratike në vend. Kuvendi nuk po funksionon për shkak të inateve politike dhe mungesës së vullnetit për kompromis,” u shpreh Koçi para mediave.
Kjo protestë vjen në një moment kritik për Kosovën.
Kuvendi ka dështuar për të 41-tën herë radhazi që të konstituohet, që nga zgjedhjet e parakohshme të mbajtura disa muaj më parë. Seanca e sotme, e thirrur nga drejtuesi i përkohshëm Avni Dehari, zgjati vetëm pak minuta. Deputetët u thirrën që të mblidhen sërish të shtunën, më 5 korrik, pas një pauze 48-orëshe.
Bllokimi i konstituimit të Kuvendit ka ngjallur shqetësim të madh në opinionin publik dhe në rrafshin ndërkombëtar, duke rrezikuar funksionimin e institucioneve demokratike në vend. Pa konstituimin e Kuvendit, nuk mund të zgjidhet as kryetari i ri i tij, e as të formohet qeveria e re, çka e lë vendin në një vakuum institucional të zgjatur
