Këngëtarja ikonike e dekadave të artë të muzikës amerikane, Connie Francis, është ndarë nga jeta të enjten, në moshën 86-vjeçare.
Lajmin e ka konfirmuar miku dhe zëdhënësi i saj, Ron Roberts, ndërsa ende nuk është bërë e ditur shkaku i vdekjes.
E lindur më 12 dhjetor 1937 në Newark të New Jersey, Francis, emri i vërtetë Concetta Rosemarie Franconero, nisi të këndonte që në fëmijëri, duke u shfaqur në emisione të njohura si “Arthur Godfrey’s Talent Scouts” dhe “The Perry Como Show”.
Në moshën 17-vjeçare, ajo nënshkroi kontratën e parë me MGM Records, por fama e saj shpërtheu në vitin 1958 kur kënga “Who’s Sorry Now?” u transmetua nga Dick Clark në programin “American Bandstand”. Brenda natës, ajo u kthye në një emër të njohur në çdo shtëpi amerikane.
Gjatë kulmit të karrierës (1957-1964), Connie Francis pati mbi 12 këngë në Top 20 të hiteve, përfshirë “Stupid Cupid”, “Lipstick on Your Collar”, “Pretty Little Baby”, “Everybody’s Somebody’s Fool”, dhe dy hite që arritën në vendin e parë: “Don’t Break the Heart That Loves You” dhe “The Heart Has a Mind of Its Own”.
Përveç suksesit në SHBA, ajo u bë një yll ndërkombëtar duke interpretuar këngët e saj në gjuhë të ndryshme si italisht, spanjisht dhe gjermanisht.
Po ashtu, ajo shkëlqeu edhe në ekranin e madh me role në filma si “Where the Boys Are” dhe “Follow the Boys”.
Connie Francis do të mbetet në histori si një nga zërat më të fuqishëm dhe më të dashur të shekullit XX, një grua që theu barriera dhe i dha frymë një epoke të tërë muzikore.
