Një bandë me seli në Londër që kontrabandonte emigrantë nga Mbretëria e Bashkuar në Francë pretendoi se “thjesht po bënin punën e qeverisë për ta”.
Shtatë anëtarë të bandës janë dënuar me gjithsej 70 vjet burg pasi kryen deri në 20 udhëtime nga Doveri në Calais midis shkurtit dhe tetorit 2023, në një shembull të rrallë të një kalimi të paligjshëm të Kanalit.
Fëmijë deri në pesë vjeç u fshehën në kamionë dhe videot i treguan ata duke bërtitur se mendonin se po dërgoheshin drejt vdekjes, raporton “The Telegraph”, transmeton Klankosova.tv.
PAMJET E PUBLIKUARA NGA “TELEGRAPH” MUND T’I SHIHNI KËTU
Disa nga kamionët nuk kishin kondicioner ajri dhe ishin të mbyllur hermetikisht, duke i vënë ata brenda në rrezik të madh nga mbinxehja dhe mbytja.
Aziz Benaniba, një shtetas algjerian 41-vjeçar dhe kreu i operacionit, ishte përgjegjës për ngarkimin e qindra emigrantëve në kamionë dhe duke u kërkuar gati 1,400 euro (1,200 funte) secilit për udhëtimin.
Rebecca Austin, nga prokuroria, tha se banda pretendonte se “thjesht po bënin punën e qeverisë për ta duke transportuar emigrantë nga Britania në Francë”.
“Të pandehurit pretenduan se me veprimet e tyre në një farë mënyre po largonin emigrantët nga Britania”, tha ajo.
“Por veprimet e këtyre të pandehurve ishin larg largimit të emigrantëve. Ata krijuan një industri ku njerëzit vinin në Britani për të kaluar ilegalisht kanalin”.
Gjyqtarja Curtis-Raleigh e burgosi Benaniban me një total prej 12 vitesh e 11 muajsh.
Ajo tha se një numër i madh emigrantësh u transportuan, teksa shtoi se janë ndaluar shtatë kamionë të rëndë dhe janë gjetur 157 emigrantë, “por padyshim kishte shumë më tepër”.
“Shkurt, mund të kishte ndodhur një katastrofë. Organizata, komploti, ju të gjithë, nuk kishin asnjë ndërgjegje për fëmijët që shkonin në këtë apo udhëtime të tjera”.
Bashkëpunëtorët e Benanibas, Mohamed Bechkit, 36 vjeç, Mahmoud Haidous, 53 vjeç, Abed Karouz, 40 vjeç, Amor Ghabbari, 32 vjeç, dhe Mohamed Abdelhadi, 50 vjeç, organizuan udhëtimet dhe punësuan një rrjet shoferësh. Ata u dënuan me nga 13 vjet e gjysmë deri në shtatë vjet.
Mohamed Bouriche, 43 vjeç, ishte përgjegjës për transportimin e njerëzve në vendet e takimeve pranë kufirit të Mbretërisë së Bashkuar, ku ata do të zhvendoseshin në kamionë. Ai u dënua me shtatë vjet e gjysmë.
Ata u arrestuan në bastisje të koordinuara në agim në veri të Londrës më 20 mars 2024.
Kontrabanda e emigrantëve nga Mbretëria e Bashkuar në Francë është e pazakontë, por tregon se sa larg shkojnë bandat për të nxjerrë fitim.
Vitin e kaluar, 93 emigrantë u arrestuan për kalim të paligjshëm nga Mbretëria e Bashkuar në Francë, sipas të dhënave nga prefektura Hauts-de-France.
Migrantët e trafikuar nga banda e Londrës u sollën në Mbretërinë e Bashkuar me viza turistike, të cilat mund t’u lejojnë të ardhurve të qëndrojnë deri në gjashtë muaj. Migrantët që mbërrijnë ligjërisht në Mbretërinë e Bashkuar me viza turistike nuk mund të deportohen domosdoshmërisht nëse ndalohen në kufirin francez.
Në një përpjekje për kalim, më 6 shtator 2023, 39 migrantë, përfshirë gra dhe fëmijë, u ngarkuan në një rimorkio kamioni hermetikisht të mbyllur në një vendpushim në Sandwich, Kent. Zyrtarët e NCA-së ndërhynë shpejt për të shpëtuar migrantët, por disa, përfshirë një fëmijë, kërkuan kujdes mjekësor.
John Turner, oficeri i lartë hetues i NCA-së, tha: “Këtyre kontrabandistëve nuk u interesonte siguria ose mirëqenia e njerëzve që i ngjeshnin në rimorkiot e kamionëve – shqetësimi i tyre i vetëm ishte të fitonin para”.
“Ne kemi parë pasojat fatale të këtij lloji krimi, pasi migrantët për fat të keq kanë humbur jetën duke u kontrabanduar përtej kufijve në tokë dhe në det”.
“Këto rrjete kriminale i trajtojnë qeniet njerëzore si mallra”.
Janine Baugh, një prokurore specialiste për Shërbimin e Prokurorisë së Kurorës, tha: “Ky ishte një grup shumë i organizuar, i cili u përpoq të kontrabandonte emigrantë në Francë më shumë se 20 herë”.
“Ata vunë në rrezik jetën e njerëzve – shpesh në kushte çnjerëzore – vetëm për të përfituar nga të tjerët. Ne i paraqitëm gjykatës një video të njerëzve që bërtisnin për t’u liruar nga një rimorkio, e cila tregon kushte të këqija”.
