Presidenti amerikan Donald Trump ka mbërritur në Skoci, ku do të zhvillojë takime me udhëheqës evropianë dhe britanikë për të diskutuar një marrëveshje të re tregtare. Ai mbërriti në Britani të premten vonë dhe pritet të takohet me kryeministrin britanik Keir Starmer dhe presidenten e Komisionit Evropian, Ursula von der Leyen.
Para se të largohej nga Uashingtoni, Trump u shpreh se synon të përmirësojë marrëveshjen tregtare me Britaninë. Nga ana e saj, von der Leyen njoftoi se kishte biseduar në telefon me presidentin amerikan dhe kishin rënë dakord të takohen në Skoci të dielën. Ajo theksoi se do të diskutojnë për të forcuar marrëdhëniet ekonomike transatlantike.
Gjatë mandatit të tij, Trump vendosi tarifa të reja ndaj shumë vendeve dhe nxiti nënshkrimin e marrëveshjeve dypalëshe për të shmangur këto barriera. Në muajin qershor, SHBA dhe Britania arritën një marrëveshje që favorizon eksportet amerikane drejt tregut britanik. Megjithatë, tensionet tregtare mes SHBA-së dhe BE-së janë rritur së fundmi. Trump ka vendosur tarifa 30% mbi produktet evropiane që hyjnë në fuqi nga 1 gushti.
Ky vendim ka shkaktuar reagim nga liderët evropianë, të cilët janë të hapur për dialog. Megjithatë, ata nuk e përjashtojnë mundësinë e kundërpërgjigjes tregtare. Takimet në Skoci do të jenë vendimtare për të ardhmen e këtyre marrëdhënieve ekonomike.
