Të paktën dy anëtarë të forcës ajrore gjermane mbetën të vdekur pasi një helikopter në të cilin po udhëtonin u rrëzua gjatë një misioni stërvitor në lindje të vendit.
Ministria gjermane e Mbrojtjes njoftoi për ngjarjen të martën në mëngjes. Një zëdhënëse e forcës ajrore gjermane i tha AFP-së se dy nga anëtarët e ekuipazhit që vdiqën ishin “me përvojë”, duke shtuar se po zhvillohej një kërkim për anëtarin e tretë.
Helikopteri, i cili ishte marrë me qira për qëllime stërvitore, u rrëzua për arsye ende të panjohura në Mulde, një lumë pranë Grimma në rajonin e Saksonisë.
Helikopteri i llojit Airbus EC-135, ishte zhdukur që nga mëngjesi i djeshëm.
Policia tha se qytetarët që po lundronin me kajak vunë re mbeturina në lumë. Një digë u ngrit në një pjesë të lumit për të kufizuar ndotjen dhe rrjedhjen e vajgurit nga mbetjet e depozitës së karburantit të helikopterit.
