Amy, një vajzë e re nga Anglia, ka kaluar më shumë se një dekadë e mbyllur në shtëpi me nënën e saj, duke pritur ndihmë për shëndetin mendor që nuk ka ardhur kurrë. E diagnostikuar me çrregullim të stresit post-traumatik kompleks (PTSD), ajo është një nga mijëra persona të kapur në një sistem të tejmbushur dhe të paralizuar të shëndetit mendor.
“Po lëndoja veten dhe nuk doja të jetoja më. Vetëm më thonë të pres, sepse shërbimet janë të mbingarkuara”, thotë Amy.
Në moshën 15-vjeçare, ajo u kërcënua me thikë. Dhuna që ka përjetuar si fëmijë e ka ndjekur gjatë gjithë jetës. Pavarësisht kontakteve të shpeshta me ekipet e krizës dhe mjekun e familjes, ajo ka takuar vetëm një herë një psikiatër gjatë gjithë kësaj kohe.
Sipas një raportimi nga BBC, një analizë e re e organizatës Rethink Mental Illness tregon se 14 mijë e 586 pacientë me sëmundje të rënda mendore kanë pritur më shumë se 18 muaj për trajtim, krahasuar me vetëm 1 mijë e 237 persona në pritje për operacione apo trajtim fizik për të njëjtën periudhë kohore.
Kjo paraqet një pabarazi 12-fish – një ndarje gjithnjë e më e thellë mes kujdesit fizik dhe atij mendor në sistemin shëndetësor britanik.
Kur nëna e Amy-t u shtrua së fundmi në spital për një problem në zemër, ajo arriti të marrë takim me specialistin brenda pak javësh. Amy, nga ana tjetër, vazhdon të mbetet në një pritje të pafund dhe pa përgjigje.
Në Londrën Lindore, një qendër e re për shëndetin mendor po dëshmon se ndryshimi është i mundur. Me akses të lirë, pa nevojë për takim, staf të specializuar dhe mbështetje komunitare, qendra ka reduktuar ndjeshëm listat e pritjes dhe ka ndihmuar pacientët të shmangin rikthimin në spital.
Kjo qendër është një nga vetëm gjashtë të tilla në gjithë Anglinë dhe shumica prej tyre janë ende në fazë testimi. Kapaciteti për t’u zgjeruar në nivel kombëtar mbetet i kufizuar për shkak të kostove dhe mungesës së stafit.
“Për shumë kohë, njerëzit janë zhgënjyer nga sistemi i kujdesit për shëndetin mendor”, thotë ministri britanik i Shëndetësisë, Stephen Kinnock.
Ai thekson se qeveria synon ta zhvendosë fokusin nga spitalet drejt kujdesit në komunitet dhe parandalimit, por kritikët vërejnë se buxheti për shëndetin mendor pritet të bjerë këtë vit – pikërisht në kohën kur kriza po thellohet.
