Britania e Madhe do të duhet të rrisë taksat për të mbuluar një hendek në shpenzimet qeveritare që pritet të arrijë mbi 40 miliardë paund, për shkak të ngadalësimit të rritjes ekonomike dhe inflacionit të lartë. Deklarata vjen nga Instituti Kombëtar i Kërkimeve Ekonomike dhe Sociale.
Kjo është një goditje e rëndë për Partinë Laburiste, që shpresonte të balanconte buxhetin pa thyer premtimet e fushatës elektorale, baza e së cilës ishte përjashtimi i rritjes së taksave personale. Sipas Institutit, disa faktorë, si lufta tarifore e Donald Trump dhe rritja e pagesave të interesit për borxhin, do të prishin planet e qeverisë për të qëndruar brenda kufijve të shpenzimeve.
Raporti specifikon rritje të moderuara, por të vazhdueshme të taksave në buxhetin e vjeshtës për të përballuar një deficit prej 41.2 miliardë paund dhe për të rikthyer afërsisht 10 miliardë paund në buxhetin aktual. Kjo do të detyrojë Ministrinë e Financave të mbledhë mbi 51 miliardë paund nga taksat, të sigurojë hua shtesë ose të ndërmarrë masa të rrepta kursimi.
Duke qenë se huamarrja shtesë mund të shqetësojë tregjet financiare dhe ministrat po përpiqen të qëndrojnë brenda kufijve të shpenzimeve për çdo departament, rritja e taksave duket opsioni më i mundshëm.
Instituti sugjeron se një rritje prej 5% në tatimin mbi të ardhurat do të mbyllte hendekun e buxhetit, megjithëse ata rekomandojnë një rishikim më të gjerë të normave tatimore dhe një reformë buxhetore për të siguruar stabilitet më të madh financiar.
Më herët, ministrja e financave paralajmëroi se taksat do të rriten, pasi qeveria hoqi kufizimet për pagesat sociale, pa specifikuar se cilët sektorë do të preken. Disa deputetë të Partisë Laburiste pritet të kundërshtojnë Reeves, nëse premtimet e fushatës elektorale do të anulohen për të ulur deficitin.
Banka e Anglisë pritet të ulë kostot e huamarrjes nga 4.25% në 3.75% deri në fund të vitit, por kjo lëvizje do të vijë shumë vonë për të nxitur rritjen.
