Një nga kartelët më të fuqishëm të krimit në Europë, i drejtuar nga shqiptarët Franc Çopja dhe Ervis Cela, është shkatërruar pas një operacioni spektakolar të SPAK dhe autoriteteve europiane.
Ky super-grup kriminal, që trafikonte dhjetëra tonë kokainë nga Amerika Latine drejt porteve të BE-së, kishte arritur deri aty sa të diktonte çmimin e kokainës në gjithë kontinentin europian!
Nga kokaina te resortet luksoze dhe arin e fshehur
Karteli kishte ngritur një perandori kriminale me miliarda euro, duke investuar në:
- pasuri të paluajtshme,
- resorte turistike,
- vila dhe apartamente luksoze.
Krerët e bandës madje sherronin mes tyre se ku ta fshehnin pasurinë marramendëse: nën rrënjët e ullinjve apo duke e kthyer në ar.
Në një bisedë të përgjuar, Cela shprehet i dëshpëruar:
“Nuk ka ar… duhet të grabis një bankë!”
Ndërsa Çopja i kundërpërgjigjej: “E njoh një njeri që mund të na sjellë 200 kg ar.”
Franc Copja
Kapje rekord – 16 tonë kokainë në një ditë!
Falë përgimit të aplikacionit të koduar Sky ECC, hetuesit zbuluan planet e kartelit për të futur në Europë 28 tonë kokainë të fshehur në sapune, kanaçe boje dhe ngjitës industrial.
- Vetëm në shkurt 2021 u sekuestruan 16.4 tonë kokainë, me një vlerë marramendëse prej 3 miliardë paundësh – konfiskimi më i madh i kokainës në historinë e Europës!
- Një tjetër ngarkesë e kaluar me sukses në vitin 2020 arrinte shifrën e 1.3 miliardë paundëve.
Autoritetet theksojnë se ky grup ishte në gjendje të menaxhonte sasi të mëdha kokaine brenda pak ditësh dhe kishte ndikim të drejtpërdrejtë në tregun europian.
Pushtet edhe në Britaninë e Madhe
Sipas National Crime Agency, një pjesë e ngarkesave u trafikua edhe drejt Mbretërisë së Bashkuar, ku bandat shqiptare kontrollojnë një pjesë të madhe të tregut.
Atje, një kilogram kokainë shitet deri në 40 mijë paund, dyfish më shumë se në kontinent.
Nga arratia te arrestimet spektakolare
- Ervis Cela, i kërkuar për 11 vite dhe i dënuar në Itali për një vrasje makabre në vitin 2008, u arrestua në qershor 2024 në bregdetin e Qeparos. Ai pritet të vuajë 21 vite burg për vrasje, rrëmbim, armëmbajtje dhe pengim të drejtësisë.
- Franc Çopja, i konsideruar “truri logjistik” i trafikut, u arrestua në Belgjikë në dhjetor 2023, pas ekstradimit nga Dubai, ku jetonte në luks marramendës. Ai është në gjyq për vrasje.
Resorti milionësh dhe “para nga krimi” në turizëm
Ndër asetet e sekuestruara spikat resorti luksoz “Ajman Park” në Shijak, vetëm 27 km nga Tirana. Me arkitekturë madhështore dhe restorante luksoze, resorti shërbente si fasadë për pastrimin e parave të drogës.
Ky aksion i SPAK është cilësuar si një nga më të rëndësishmit të dekadës, pasi rrëzon mitin e pandëshkueshmërisë së krerëve të krimit shqiptar dhe ngre pikëpyetje mbi rrënjët e kapitalit gjigant të derdhur në turizëm dhe ndërtim në Shqipëri.
